ज्ञानोदय माविया न्हूगु कक्षा व सभाकक्षया उलेज्या

येँ – येँ महानगरपालिका १३ वडाया ज्ञानोदय माध्यमिक विद्यालयया न्हूगु कक्षा क्वथा व सभाकक्षया उलेज्या याःगु दु । प्रदेश सांसद पूर्वाधार विकास कार्यक्रमपाखें प्राप्त अनुदानपाखें ब्वनेकुथिया कक्षा क्वथा व सभाकक्ष तयार याःगु खः ।

ब्वनेकुथिया क्वथा व सभाकक्षया उलेज्या यासें बागमति प्रदेशसभा सदस्य राजेश शाक्यं ज्ञानोदय स्कुलपाखें शिक्षा कयाः मेमेगु सामुदायिक ब्वनेकुथितय्सं नं स्तरीय शिक्षाया निंतिं न्ह्यचिलेमाःगु खँ धयादिल । थःगु क्षेत्र लाःगु थीथी ब्वनेकुथितय्सं ज्ञानोदयं थें हे मेहनत यायेगु खःसा दशौ हजार विद्यार्थीतय्त ब्वंके फइगु अवस्था दु धासें वय्कलं छगू हिन्दी संकिपाया उदाहरण न्ह्यब्वयादिसें इच्छा यायेगु खःसा सामुदायिक ब्वनेकुथितय्सं नं न्यूनतम शुल्कय् उच्चस्तरीय शिक्षा बी फइ धयादिल ।

ब्वनेकुथिया विकासया निंतिं चान्हि खटे जुयादीम्ह प्रधानाध्यापक नातिकाजी महर्जनयात च्वछायादिसें थःगु छेँ लिक्क लाःगुलिं न्ह्यागु इलय् ब्वनेकुथिइ वःसां वय्कःयात नाप लानाच्वनीगु व ब्वनेकुथिया भौतिक निर्माण व शैक्षिक गुणस्तरया विषयय् चिन्तन मनन यानाच्वनादीगुलिं हे विद्यालयं छगू उचाइ कायेत ताःलाःगु वय्कलं धयादिल । येँ महानगरपालिका शिक्षा विभागया रामप्रसाद सुवेदीं महानगरपाखें निर्माण यानाबीमाःगु भौतिक पूर्वाधार प्रदेशपाखें ग्वाहालि प्राप्त जूगुलिं सुभाय् देछासें ब्वँमिपिनिगु न्हापांगु प्राथमिकताय् लाःगु ब्वनेकुथि जूगुलिं निर्माण सम्पन्न जूगु कक्षा क्वथा व सभाकक्षं ब्वनेकुथियात अझ स्तरीय यायेत ग्वाहालि याइगु विचाः प्वंकादिल ।

विशेष पाहांकथं झायादीम्ह येँ महानगरपालिका १३ वडाअध्यक्ष्ष ध्रुवनारायण मानन्धरं ब्वनेकुथिया हरेक गतिविधिइ गुगुं नं रुपय् थः संलग्न जुयाच्वने खंगुलिं गौरवान्वित जूगु धासें ब्वनेकुथिया विकासया निंतिं थःपाखें जुइ फइगु फक्व ग्वाहालि यानाच्वनेगु जुइ धयादिल । ब्वनेकुथिया प्रधानाध्यापक नातिकाजी महर्जनं ब्वनेकुथिया बारे जानकारी बीगु झ्वलय् सकसिगुं ग्वाहालिपाखें हे शैक्षिक व भौतिक प्रगति यायेत सफल जूगु खः धासें न्ह्याबलें थुकथं हे ग्वाहालि प्राप्त जुयाच्वनीगु विश्वास प्वंकादिल । वय्कलं कोरोनाया कारणं भौतिक उपस्थितिइ आखः ब्वंकेत समस्या जूसां अनलाइनया माध्यमं विद्यालय अवधितक हे पाठनपाठन संचालन जुयाच्वंगु नं जानकारी बियादिल ।

प्रदेश सांसद शाक्यया पूर्वाधार विकास कार्यक्रमपाखें उपलब्ध बजेटपाखें निर्माण जूगु कक्षा क्वथा व सभाकक्षया निंतिं ४३ गू लख पीखुद्वः व ७९६ तका खर्च जूगु उपभोक्ता समितिया अध्यक्ष शिवहरीप्रसाद उपाध्यायं जानकारी बियादिल । विद्यालय व्यवस्थापन समितिया अध्यक्ष उर्मिला मालीया सभापतित्वय् जूगु ज्याझ्वलय् भवन निर्माणय् ग्वाहालि यानादीपित कदर पत्र व सम्मानपत्र नं लःल्हाःगु खः ।