मानवाधिकारवादी नेता डा. मथुरा श्रेष्ठ मंत
येँ – वरिष्ठ मानव अधिकारवादी नेता लिसें पुलांम्ह मन्त्री डा. मथुरा श्रेष्ठ थौं सुथय् मंत । थौं सुथय् थनया माइतीघरय् च्वंगु अन्नपूर्ण न्यूरो अस्पतालय् वासः याकुयाकुं ४ः१५ बजे वय्कः मदुगु खः । वय्कः ८८ दँ दुम्ह खः ।
नेपालय् जूगु प्रजातन्त्र पुनर्वहालीया आन्दोलन लिसें मानव अधिकार आन्दोलनय् वय्कः शुरुंनिसें हे आवद्ध जुयादी । वरिष्ठ मानव अधिकारवादी नेता पद्मरत्न तुलाधरया अध्यक्षताय् गठन याःगु नेपाःया हे न्हापांगु मानव अधिकारवादी संस्था बन्दी विमोचन समितिइ नं वय्कः दुजःया रुपय् च्वनादीगु खः ।
वि.सं. २०४६ सालया जनआन्दोलन सफल जुइधुंकाःलि नेपाली कांग्रेसया कावा सभापति कृष्णप्रसाद भट्टराईया नेतृत्वय् गठन याःगु अन्तरिम सरकारय् वय्कः स्वास्थ्यमन्त्री कथं च्वनादीगु खः ।
नेपाःया न्हापांगु मानव अधिकार संगठन ‘मासम’ या वय्कः अध्यक्ष नं खः ।
वय्कःया अन्तिम संस्कार कन्हय् सुथय् ९ बजे पशुपति आर्यघाटय् याइगु ग्वसाः दु । वय्कःया सीम्हयात आः टिचिङ अस्पतालय् तयातःगु दु ।
मदुम्ह श्रेष्ठया स्वम्ह काय व छम्ह म्ह्याय् दी । वय्कःया जहान डा. इन्दिरा श्रेष्ठ नं थगुने तिनि मदुगु खः । डा. श्रेष्ठया प्यम्ह कायम्ह्याय्पिं मध्ये स्वम्ह डाक्टर व छम्ह इन्जिनीयर ख: ।
LEAVE YOUR COMMENTS