वज्राचार्य संरक्षण गुथिया दँमुँज्या

येँ(नेपालभाषा टाइम्स)- वज्राचार्य संरक्षण गुथि (वसंगु)या स्वीच्याक्वःगु दँमुँज्या वंगु आइतवाः जुल । वैरोचन तीर्थ बुद्ध विहारस्थित गुथिया थःगु हे भवनय् दँमुँज्या जूगु खः ।

गुथिया नायः सागरमान वज्राचार्यया सभापतित्वय् जूगु दँमुँज्याय् न्वकु शारदामुनि वज्राचार्यं लसकुस यानादीगु खः ।
दँमुँज्याय् गुथिया मूछ्याञ्जे मुनीन्द्ररत्न वज्राचार्यं वार्षिक प्रगति प्रतिवेदन व दांभरिं त्रिरत्न वज्राचार्यं आथिक प्रतिवेदन नापं लेखापरीक्षणया प्रतिवेदन न्ह्यब्वयादीगु खः ।

उगु दँमुँज्याय् प्रा. डा. नरेशमान वज्राचार्यं गुथिया महत्व व आवश्यकता विषयय् थःगु नुगःखँ तयादीगु खःसा छ्याञ्जे चुडामणि वज्राचार्य, दुजःपिं गुणीन्द्ररत्न वज्राचार्य, आनन्दमुनि वज्राचार्य व सुरेन्द्र वज्राचार्य लगायतं नं थःथःगु नुखँ तयादीगु खः । गुथिया दँमुँज्याया हे झ्वलय् थुगुसी देय् आचागू पाः फइपिं स्वम्ह पाःलाःपिंत आर्थिक ग्वाहालि यायेकथं अनुदान नं लःल्हाःगु खः ।

येँ देय्या वज्राचार्य समुदायया परम्परागत देय् आचागू थ्व हे वइगु चिल्लागा अस्तमि, बुधवाः व नवमि विहीवाः (चैत १ व २ गते) निन्हुयंकं जू वनाच्वंगु दु । देय् आचागूया न्हापांगु दिं स्वयम्भू महाचैत्य परिसरया शान्तिपू व निन्हुया दिया ज्याझ्वः येँ हनुमान ध्वाखा लाय्कूस्थित नासःचुकय् जुइ ।