ने. सं. ११४४ कछलागा षष्ठी -

मरु सतः तःधं कि अन दुने च्वंगु मूर्ति तःधं ?

येँ – मरु सतः दुने तयातःगु गोरखनाथ द्यः व प्यम्ह गणेद्यःया ल्वहंयागु मूर्ति न्हूगु दयेकाः तल धइगु खँय् पिहां वःगु विवादं यानाः शनिवाः जुइत्यंगु लोकार्पण ज्याझ्वः हे झण्डै लिज्याइगु अवस्था पिदन । राष्ट्रपति ज्याकुथी थ्यंक हे थ्यंगु थ्व विवादया मुद्दां यानाः लोकार्पण ज्याझ्वः प्रभावित जुइत्यंगु खःसां अन्ततः राष्ट्रपति झायाः लोकार्पण यानादिल ।

२०७२ सालया तःभुखाचं थ्व न्याम्हं द्यःया मूर्ति तज्याःगु कारणं काष्ठमण्डप पुनर्निर्माण समितिं अन न्हूगु मूर्ति दयेकाः पलिस्था याःगु खः । तर छुं सम्पदा अभियन्तातय्सं पुलांगु मूर्तिया पुरातात्विक महत्व दइगु जूगुलिं अन न्हूगु मूर्ति तल धासें सर्वोच्च अदालतय् रिट दायर याना बिल ।

तर पुनर्निर्माण समितिया नायः राजेश शाक्यं कनादी कथं अन पुलांगु मूर्तिया थासय् न्हूगु तयागुया धार्मिक कारण दु । झीथाय् खण्डित मूर्ति पुज्याये मजिउ व पुज्यात धाःसा पुज्याःम्हेसित उकिया पुण्य लाइ मखु धइगु धार्मिक मान्यता दुगु जुयाः पुलांगु खण्डित मूर्तिया थासय् न्हूगु मूर्ति तःगु खः । बौद्ध ग्रन्थ क्रिया संग्रह, हिन्दू ग्रन्थ रुप मण्डल व शिव पुराणय् खण्डित मूर्ति पुज्याये मजिउ धासें मूर्ति खण्डित जुल धाःसा ल्वहंयागु जूसा खुसिइ चुइकेगु, सिँयागु जूसा छ्वयेकेगु व चायागु जूसा चाय् हे ल्हाकेगु धकाः उल्लेख जुयाच्वंगु खँ कनादिल ।

नेवाः संस्कृतिइ म्वाःद्यः कुमारीयात नं यदि घाः जुल, हि पिहां वल, तःधंगु कै आदि वल धाःसा हिलीगु परम्परा दु धासें ल्वहंयागु मूर्तिइ नं अथे छुं खराबी वल धाःसा हिलेमाः धइगु मान्यता कथं न्हूगु मूर्ति तयागु खँ वय्कलं कनादिल ।

गोरखनाथया मूर्ति हिलेगु बारे मृगस्थलीया कानफट्टातय् प्रमुख श्रीषानाथ मठाधीशयाके अनुमति कयागु खँ नं वय्कलं कनादिल ।
अथे हे काष्ठमण्डप धइगु गोरखनाथ वा गणेद्यःया देगः मखुगु जूगुलिं मूर्तिइ विवाद वल धायेवं तुं मरु सतः हे लोकार्पण याये मजिउ धाये मछिंगु तर्क नं वय्कलं तयादिल । मरु सतः न्हापा दयेकूगु व अन दुने गोरखनाथ व गणेद्यःया मूर्ति लिपा तिनि तये हःगुलिं मरु सतः स्वयां थ्व मूर्तित महत्वपूर्ण मखुगु खँ नं वय्कलं कनादिल ।

अथे हे पुनर्निर्माण समितिया सचिव गौतम डंगोलं थन धार्मिक मान्यता व पुरातात्विक मान्यता दथुइ मतभेद जूगु खनेदु धासें आः सर्वोच्च अदालतं छु फैसला यात वहे माने याये धायेधुंकाः थ्व विषयय् विवाद याना च्वनेमाःगु आवश्यकता मदयेधुंकूगु खँ कनादिल ।