हुलाप्याखं कासाया अडिसन क्वचाल
येँ(नेपालभाषा टाइम्स)÷वइगु माघ १४ गते शनिवाः थनया वसन्तपुलिइ जुइगु नेवाः हुलाप्याखं धेंधेंबल्लाः कासा–११४३य् अन्तिम प्रतिस्पर्धाय् ब्वति काइपिं प्रतियोगीत छनोट ययेगु ज्या क्वचाःगु दु । वंगु शनिवाः येँ, यल, ख्वप व किपुलिइ जूगु अडिसनं अन्तिम प्रतिस्पर्धाया निंतिं कासामि छनोट याःगु खः ।
ग्वसाः खलः नेपाल राष्ट्रिय खड्गी समाज येँ जिल्ला समितिं बिउगु जानकारीकथं अन्तिम प्रतिस्पर्धाया निंतिं थनया जगतसुन्दर ब्वनेकुथिइ जूगु अडिसनं १० म्ह, यलया आदर्श कन्या निकेतन मा.वि.इ जूगु अडिसनं १०म्ह, ख्वपया मेधा माध्यमिक विद्यालयय् जूगु अडिसनं १२ म्ह व किपूया हिलटाउन उच्च मा.वि.इ जूगु अडिसनं ९ म्ह प्रतियोगी छनोट जूगु खः ।
अडिसनपाखें छनोट जूपिं प्रतिस्पर्धी दथुइ वइगु शनिवाः वसन्तपुलिइ अन्तिम प्रतिस्पर्धा जुइ ।
समाजया ग्वसालय् मुक्कं नेपालभाषाया आधुनिक व लोक म्येँय् हुलाप्याखं कासा जूवनाच्वंगु दु । कासाय् ब्वति काइपिंसं नेवाः पह, नेवाः संस्कृति, नेवाः म्हसीका पिज्वइकथंया जक हलंज्वलं छ्यले दइ ।
१२ दँनिसें २० तकया मस्तय् दथुइ एकल हुलाप्याखं कासा जुइत्यंगु खः । छगू हुलाप्याखनय् छम्हेसिनं जक ब्वति काये दइगु कासाय् न्हाप, लिउ, लियांलिउ, प्यंगूगु व न्यागूगु थासय् वयेत ताःलाःपिंत ट्रफीसहितत पुरस्कृत यायेगु ग्वसाः खलकं जानकारी बिउगु खः । अथे हे उत्कृष्ट भेषभूषा, हाउभाउ, समाः, कोरियोग्राफर व हुलाप्याखनय् न्ह्यब्वइगु हलंज्वलनय् नं पुरस्कृत यायेगु ग्वसाः खलकं धाःगु दु ।
LEAVE YOUR COMMENTS