विपक्षी दलबारे कांग्रेसं काल सुझाव
येँ (नेपालभाषा टाइम्स)÷प्रमुख प्रतिपक्षी दलया मान्यता थःपिंत दइगु खः लाकि मखु धइगु विषयय् बिचाः दयेकेगु लागिं नेपालं कांग्रेसं कानुन व्यवसायीत लिसे परामर्श याःगु दु ।
कांग्रेस संसदीय दलया ज्याकू सिंहदराबारय् पार्टी सभापति शेरबहादुर देउवा, महामन्त्रीपिं गगन थापा, विश्वप्रकाश शर्मा व प्रमुख सचेतक रमेश लेखकं कानुन व्यवसायीतलिसे सलहल याःगु खः ।
सहलहय् दुथ्याःम्ह छम्ह कानुन व्यवसायीया कथं प्रतिपक्षी दल हैसियत कांग्रेसयाके हे दु धकाः थम्हं सुझाव बियागु खँ कनादीगु दु । सल्लाह बीगु झ्वलय् कानुन व्यवसायीतय्सं कांग्रेस प्रतिपक्षी दल हे जूगु, संसद सचिवालयं प्रमुख प्रतिपक्षी दलया कुर्सी छुटे यानातःगु, प्रमुख प्रतिपक्षी दलया नेतायात दइगु सेवा सुुविधाया निंतिं संसद सचिवालयं पौ च्वःगुलिं थुकी दुविधा जुइम्वाःगु सुझाव नं बिउगु खः ।
कांग्रेसं वरिष्ठ अधिवक्तापिं शम्भु थापा, रामनारायण विडारी, महादेव यादव, खम्बबहादुर खाति, राधेश्याम अधिकारी, गोविन्द बन्दी, रमण श्रेष्ठपिं लिसे सहलह ब्याकूगु खः ।
प्रधानमन्त्री पुष्पकमल दाहालयात विश्वासया मत बिउगु धासें कांग्रेसया सभापति शेरबहादुर देउवायात विपक्षी दलया मान्यता मदइगु खँ पिहां वःगु खः । वय्कःयात विपक्षी दलाया नेताया सुविधा बी दइ मखु धासें सर्वोच्च अदालतय् अधिवक्ता विमलप्रसाद पोखरेलं रिट नापं दर्ता याःगु खः । उगु रिटय् सुनुवाइ यासें सर्वोच्च अदालतं संसद सचिवालय व कांग्रेसयात कारण देखाउ आदेश समेत जारी यायेधुंकूगु दु । रिटयात कयाः कंस सोमवाः सुनुवाइ जुइ ।
LEAVE YOUR COMMENTS