‘नेवाः ख्यःया विकासया निंतिं प्रस्ताव हयादिसँ’

येँ– नेवाः भाय्, तजिलजि, सम्पदाया लिसें संचार ख्यःया विकासया निंतिं विश्व नेवाः संगठनं फुचाःगु ग्वाहालि याइगु खँ संगठनया नायः सिजन श्रेष्ठं धयादीगु दु ।

विश्व नेवाः सम्मेलनया निंतिं नेपाः झायाच्वनादीपिं थीथी देय्या प्रतिनिधिपिंत लसकुस यासें ईल्वहं प्रकाशनपाखें शुक्रवाः याःगु बःचाःधंगु नेवाः भ्वय्या झ्वलय् न्ववानादिसें वय्कलं थ्व खँ धयादीगु खः ।

‘नेवाःतय् थपूया निंतिं ज्या यायेगु कथं प्रस्ताव छ्वयाहल धाःसा उकियात स्वयाः पाय्छि ताःगु प्रस्तावय् विश्व नेवाः संगठनं नापं च्वनाः ज्या यायेत तयार दु’ वय्कलं धयादीगु दु ।

थ्व झ्वलय् वय्कलं ईल्वहं प्रकाशनपाखें पिथना वयाच्वंगु ‘लाय्कू’या विश्व नेवाः सम्मेलनयात कयाः पिथंगु विशेष ल्याःया ब्वज्या नं यानादीगु खः ।
ज्याझ्वलय् न्ववानादिसें न्यूयोर्कया प्रतिनिधि सुनिल महर्जनं नेवाःतय्त न्हापांनिसें व्यापार व्यवसाय याना वयाच्वंपिं धाःसां आः नेवाःतय् लजगाः फुक्क गैरनेवाःतय्सं कब्जा याना वनाच्वंगु खँ धयादिसें नेवाःत व्यापार व्यवसाययात च्वन्ह्याकेगु निंतिं नं कुतः यायेमाःगु खँ धयादिल ।

ईल्वहं प्रकाशनया व्यवस्थापन दर्शनवीर शाक्यं लसकुस यानादीगु ज्याझ्वलय् प्रकाशनया प्रबन्ध निर्देशक नरेशवीर शाक्यं विश्व नेवाः संगठनं ग्वाहालि बीगु जक मखुकि नेपालं पिदना वयाच्वंगु संचारख्यः, संचार माध्यमपाखें नं संगठनं नं लबः कायेमाः धयादिल ।

ज्याझ्वलय् विश्व नेवाः सम्मेलनया संयोजक दया शाक्य, संगठनया प्रवक्ता कृष्ण चखुं लिसें थीथी देय्या प्रतिनिधिपिं सहभागी जुयादीगु खः ।

सम्बन्धित बुखँ

LEAVE YOUR COMMENTS