भारतं येँ–रक्सौल स्वाइगु रेलमार्ग दयेकेगु सहमति
येँ– येँ नं भारतया सीमा रक्सौल तक रेलमार्ग दयेकेगु निंतिं नेपाः व भारत दथुइ सहमति जूगु दु । भारत भ्रमणय् झायाच्वंम्ह प्रधानमन्त्री केपी ओली व भारतीय समकक्षी नरेन्द्र मोदी दथुइ दिल्ली जूगु औपचारिक वार्ता लिपा पितबिउगु मंकाः विज्ञप्तिइ रेलमार्ग दयेकेगु सहमति जूगु खँ न्ह्यथनातःगु खः ।
थ्व सहमति कथं भारतीय पक्षं दछिया दुने रेलमार्ग दयेकेगु प्रारम्भिक सर्वेक्षण क्वचायेकेमाः । रेल गुबलय् दयेकेगु सुरु यायेगु व लगानीया बारे धाःसा विस्तृत परियोजना प्रतिवेदन दयेकेधुंकाः जक निर्णय यायेगु नं सहमति जूगु खः । तर थ्व रेलमार्ग धाःसा भारतया आर्थिक ग्वाहालिं दयेकीगु खँ वक्तव्यय् न्ह्यथनातःगु दु ।
चीनं नं केरुङ निसें राजधानी येँ तक रेलमाग दयेकेगु तयारी यानाच्वंगु इलय् भारतं नं थःगु सीमा स्वाइगु थासं निसें येँय् तक रेलमार्ग हयेगु निंतिं ग्वाहालि यायेगु प्रतिबद्धता प्वकूगु खः ।
भारतं रेलमार्ग दयेकेगु ग्वाहालि याये धाःगुया अर्थ चीनयात चुनौति बीगु निंतिं हे वःगु खँ राजनीतिक विश्लेषकतय्सं धाःगु दु ।
थ्व झ्वलय् भारतीय पक्ष लिसे थीथी न्यागू सीमाक्षेत्रपाखें रेल मार्ग हयेगु ज्या नं न्ह्याकेगु सहमति जूगु खः । थौंकन्हय् न्यु जलपाइगुडी–काँकडभिट्टा, नौतन्वा–
भैरहवा, नेपालगञ्ज रोड–नेपालगञ्ज, जयनगर–बिजलपुरा–बर्दिवास व जोगवनी– विराटनर रेलमार्गया ज्या जुयाच्वंगु खँ धाःगु दु ।
अथेहे वक्तव्यय् जयनगरया जनकपुर÷कुर्था व जोगवनीपाखें विराटनगर स्वाइगु रेलमार्ग धाःसा सन् २०१८ दुने हे दयेके क्वचायेकेगु खँ नं न्ह्यथनातःगु दु ।
LEAVE YOUR COMMENTS