नेवाः देय् दबूया २६ क्वःगु बुसादँ हन

येँ – नेवाःतय् राष्ट्रिय संगठनया कथं न्ह्यानाच्वंगु संस्था नेवाः देय् दबूया नीखुक्वःगु बुसादँ कोभिड १९ या हुनी सकल नेवाःत छथाय् मुनाः हनेमफइगु जूगुलिं मंगलवाः जूम भर्चुलपाखें हनाज्याझ्वः याःगु दु ।

मूपाहां कथं झायादीम्ह हनेबहःम्ह मानव अधिकारवादी, नेवाः न्ह्यलुवाः, दबूया संरक्षक मल्ल के सुन्दरं नेवाः भाय् व नेवाः संस्कार मत्वःतुसे च्वनाच्वंपिं स्वनिगःया नेवाः, स्वनिगलं पिने नेवाःभाय् मसयेकाः थःपिनिगु संस्कार तंकाः कतःया भाय् व संस्कारयात नालाच्वने बाध्य जूपिं नेवाःतय्गु समस्या बिस्कं बिस्कं जुइगुलिं सरोकार वालात नाप सहलह ब्याकाः योजना बद्ध तरिकां नेवाःतय्त दबुलिं छसीकथं न्ह्यज्याका यंके माःगुलिइ बःबियादिल ।

अथेहे विशेष पाहां कथं झायादीम्ह शताब्दी पुरुष सत्यमोहन जोशीं नुगःखँ तयेगु झ्वलय् नेवाः तय्त कःघाइगु मूम्हसीका धैगु नेवाः भाय् जूगुलिं नेवाः भाय् मसःपिं सकल नेवाःतय्त जि नेवाः खः धैगु म्हसीका बिइफइगु कथं नेवाःभाय् स्यनेगु अभियान दबुलिं न्ह्याकायंके हथाय् जूगु खँ कनादिल । अथेहे आः जुइगु राष्ट्रिय जनगणनाय् थःगु भाषा नेपालभाषा, पुर्खा नेवाः च्वकाः नेवाःतय्गु सही ल्याः दर्ता याकेमाःगु खँय् जोशी बः बियादिल ।

मुँज्या नायः नरेश ताम्रकारं हनेबहःपिंन्सं बियादीगु सल्लाह सुझावयात छ्यलाबुलाय् हयेगु बचं बिसें सहलह ज्याझ्वःया योजना न्हापाहे यायेधुंगु थौं निसें हे सहलह ज्याझ्वः न्ह्याकायंकेगु नं जानकारी बियादिल ।

दबूया मूछ्याञ्जे माइला बाबु द्योलां न्ह्याकादीगु उगु ज्याझ्वलय् जूमय् प्राविधिक ग्वाहालि राजन डंगोलं यानादीगु खःसा बालकृष्ण हलुवाइ–धरान, परशुराम श्रेष्ठ–बाग्लुङ, ज्ञानकाजी मानन्धर-भोंतपिन्त नेपालभाषा, साहित्य व संस्कृतियात च्वन्ह्याकेत आपालं सफू च्वसुत च्वयाः योगदान यानादीगुलिं दबूपाखें हनापौ लःल्हाःगु दु ।

मूपाहां मल्लं नेपालभासं तयादीगु न्वचूयात कयाः दबूया मिसा कवःया नायः रश्मिला प्रजापतिं सारसंक्षिप्तं खस भाषं भाय् हिलाः न्ह्यब्वयादीगु खः ।