सभापति देउवा विरोधी पक्षया बिस्कं भेला

येँ – संसद पुनस्र्थापना मजुल धाःसा कांग्रेसया अस्तित्व हे संकटय् लाइगु निष्कर्ष पिकाःगु दु । प्रतिनिधिसभा विघटनयात कयाः आन्दोलनय् कुहां वयेत हिचकिचे जुयाच्वंगु कांग्रेसया नेतातय्गु छगू बिस्कं भेलां उगु निष्कर्ष पिकाःगु खः ।

म्हिगः धौख्यलय् कांग्रेसया केन्द्रीय दुजः डा. शेखर कोइराला सहित च्वंगु बैठकं उगु निष्कर्ष पिकाःगु खः । कांग्रेसं प्रतिनिधिसभा विघटन असंवैधानिक धाःसां नं उकियात कयाः सशक्त रुपं आन्दोलनय् कुहां वयाच्वंगु मदु ।

भेलाय् दुथ्याःम्ह छम्ह नेताया कथं प्रधानमन्त्री केपी शर्मा ओलीं चुनाव याकीगु व सत्ता हस्तान्तरण यायेत संसद विघटन याःगु मखु, तर थ्व तथ्य मथूथें यानाः सभापति शेरबहादुर देउवा प्रस्तुत जुयाच्वंगु विषयय् म्हिगः सहलह जूगु खः ।

उम्ह नेतां धयादी, ‘पार्टी सभापति कन्फ्युजनय् दु, अथे जुयाः पार्टी निर्णय अःखः अर्थ लाइगु कथं न्ववानाच्वंगु दु, तर वय्कः म्हगसं पिहां वयेमाःगु दु । पार्टीया बैठकं संसद विघटनयात असंवैधानिक धायेधुंकल, असंवैधानिकयात संवैधानिक दयेकेगु मखुगु पलाः भिंकेमाः धइगु हे खः ।’
म्हिगः अन भेला जूपिं सकलें धयाथें केन्द्रीय दुजःतय्सं सर्वोच्च अदालतं संसद विघटनया विषयय् फैसला बी न्ह्यः हे संसद पुनस्र्थापना जुइगु लकस ब्वलंकेमाः धइगु धापू पित बिउगु खः । म्हिगःया भेलां जःलाखःला देय्यात लय्तायेकेगु व राष्ट्रपति सहित संवैधानिक निकाययात ल्हातय् कयाः ओलीं संसद विघटन याःगुया लिउने ताःहाकःगु योजना दुगु खँ नं कांग्रेसं थुइकेमाःगु निष्कर्ष पिकाःगु खः ।

म्हिगःया भेलाय् दुथ्याःम्ह मेम्ह कांग्रेसी नेतां भेलाय् जूगु खँ कँसें धयादिल, ‘आः राज्य शक्तिया दोहन यानाः प्रचण्ड व नेपालयात सिधयेकेगु कुतः जुयाच्वंगु धासें कांग्रेस ओलीया ललिपपय् फँसे जुइगु खःसा वयां लिपा कांग्रेसया पाः वइ, अथे जुयाः आः संसदीय प्रणाली ल्यंकेत संसद पुनस्र्थापना जुइमाः ।’

थ्व स्वयां न्ह्यः शेखर कोइरालां प्रम ओलीया प्रतिगमन विरुद्ध आन्दोलन मखुसें निर्वाचनया तयारी यायेमाः धकाः थःगु धापू प्वंकेगु याना वयाच्वंगु खः ।

देउवा आः तक छाय् ढुलमुल ?

प्रधानमन्त्री केपी ओलीं संसद विघटन याःगु निला दयेधुंकूगु इलय् नं कांग्रेस सभापति शेरबहादुर देउवां आः तक विघटनया पक्ष वा विपक्षय् ठोस रुपं खँ तये मफुगु खँय् पार्टी दुने वय्कःया कडा आलोचना जुयाच्वंगु दु । सूत्रतय्सं धाःकथं प्रम ओलीं यदि संसद पुनस्र्थापना जुल धाःसा थःगु पार्टीं देउवायात हे प्रधानमन्त्री जुइत समर्थन याये धकाः आश्वासन बियातःगु कारणं यानाः देउवा आः तक विघटनया बारे मौन जुयाच्वंगु अनुमान यानाहःगु दु । नापं ओलीं वय्कःयात वैशाखं चुनाव याये मफुत धाःसा राजीनामा बी धकाः बचं बियातःगु खँ नं चर्चाय् वयाच्वंगु दु ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु