मंसिरं अन्तर्राष्ट्रिय बौद्ध सम्मेलन

येँ(नेपालभाषा टाइम्स)- लुम्बिनी विकास कोषं वइगु मंसिरय् लुम्बिनीइ अन्तर्राष्ट्रिय बौद्ध सम्मेलन याइगु जूगु दु । कोषया आः नकतिनि च्वंगु परिषद् बैठकं उगु निर्णय याःगु खः ।

बैठकं कोरोना महामारीया ाकारणं लुम्बिनीइ वइपिं पर्यटकया ल्याः म्हो जूगु व अन्तर्राष्ट्रिय समुदायय् लुम्बिनीया प्रचार प्रसार यानाः पर्यटकया ल्याः अप्वयेकेगु ल्याखं अन्तर्राष्ट्रिय बौद्ध सम्मेलन यायेगु निर्णय याःगु खः ।

कोषया अध्यक्षलिसें संस्कृति, पर्यटन तथा नागरिक उड्डयन मन्त्री जीवनराम श्रेष्ठया अध्यक्षताय् वंगु बुधवाः च्वंगु बैठकं वइगु मंसिरय् अन्तर्राष्ट्रिय बौद्ध सम्मेलन यायेगु नापं लुम्बिनीया वृहत विकासया निंतिं थीथी ज्या यायेगु नं निर्णय याःगु खः ।

बैठकं बौद्ध सम्मेलनया निंतिं तयारी न्ह्याकेगु नं निर्णय याःगु दु । कोषया उपाध्यक्ष भिक्षु मैत्तेयया संयोजकत्वय् तयारीया ज्या न्ह्याकेगु निर्णय याःगु खः । कोषया अध्यक्षलिसें मन्त्री श्रेष्ठं लुम्बिनीलिसे स्वानाच्वंगु हरेक क्षेत्रया विकासय् संघीय सरकारं ध्यान बीगु जुइ धासें रामग्राम व देवदहया गुरुयोजना दयेकाः विकास यायेगु व तिलौराकोटयात विश्व सम्पदाया धलखय् दुथ्याकेगु नं धयादीगु दु ।

कोरोना संक्रमणया कारणं सुस्त जुयाच्वंगु पर्यटन ख्यःया विकास यायेगु ल्याखं सरकारं सन् २०२३ निसें २०३३ या दशकयात नेपाल भ्रमण दशक क्वःछिनाः न्ह्याः वनेगु तयारी सरकारं यानाच्वंगु नं मन्त्री श्रेष्ठं बैठकय् जानकारी बियादीगु दु । विश्वया पर्यटकया निंतिं छगू प्रमुख गन्तव्यया रुपय् दयाच्वंगु लुम्बिनीइ बुद्ध सर्किटलिसे स्वानाः उकिया विकासया निंतिं मन्त्रालयं ज्या न्ह्याकेगु प्रतिवद्धता नं वय्कलं प्वंकादीगु दु ।

थ्व हे झ्वलय् भैरहवाय् च्वंगु लुम्बिनी अन्तर्राष्ट्रिय विमानस्थलयात अझ व्यवस्थित यानाः संचालन यायेगु व विमानस्थलपाखें फक्व अप्वः पर्यटक दुकायेगु लक्ष्य दुगु नं वय्कलं धयादीगु दु ।

थुकथं हे कोष अन्तर्गतया परिषदं कपिलवस्तु तिलौराकोटयात विश्व सम्पदाया धलखय् दुथ्याकेत आवश्यक रणनीति दयेकेगु, दस्तावेज तयार यायेगु व ग्लोबल बुद्धिष्ट फोरम गठन यायेगु विषयय् नं सहलह जूगु कोषं जानकारी बिउगु दु ।

सम्बन्धित बुखँ

LEAVE YOUR COMMENTS