
किपू – नेपाल कम्युनिष्ट पार्टी (नेकपा) किपू नगर कमिटीया ग्वसालय् सोमवाः नेपाल संवत् ११४० न्हूदँ व स्वन्ति नखःया लसताय् भिंतुना कालबिल ज्याझ्वः जुल । किपूया न्हूबजारय् जूगु ज्याझ्वलय् पार्टीया ३ नं. प्रदेश इन्चार्ज अष्टलक्ष्मी शाक्य मूपाहाँ कथं झायादीगु खः । मूपाहाँया थासं न्ववानादिसें वय्कलं नेवाःतय्सं थःगु पहिचान ल्वःमंके मज्यूगु व थःगु संस्कृति नं त्वःफिके मज्यूगु खँ कनादिल ।
लिसें वय्कलं बुलुहँु बुलुहँु संस्कृति त्वःता वनाच्वंगुपाखे च्यूताः प्वंकादिल । थौंकन्हय् सुयांनं बुन्हि हनेबलय् केक तानाः, मैनमत फू यानाः हनाच्वंगुयात कुंखिनादिसें झीसं मत स्याना मखु मतच्याकाः न्हून्हूगु जोशजाँगर क्यना ज्या यायेमाः धकाः ध्वाथुइका दिल । थ्व ई धयागु आः देय् दयेकेमाःगु ई जूगुलिं जनप्रतिनिधिपिंत जक मब्वाकूसे झी सकलें जानाः देय् दयेकेमाः धयादिल ।
नेपाल संवत्यात सरकारी मान्यता नं बीधुंकूगु अवस्थाय् थ्व संवत् नीस्वनादीम्ह शंखधरयात गुबलें नं ल्वःमंके मज्यूगु खँ कनादिसें न्हूदँया भिंतुना बियादिल । ज्याझ्वलय् विशेष पाहाँया थासं पार्टीया ३ नं. प्रदेश अध्यक्ष नारायण दाहालं नं नुगः खँ तयादीगु खः । पार्टीया केन्द्रिय कमिटी दुजः दिलिप महर्जनं किपू नगर कमिटीया दुजःपिनिगु नां घोषणा यानादीगु खः ।
गुकी अध्यक्षय् बिकास महर्जन व सचिव दिल बहादुर महर्जनलिसें खुइस्वम्ह दुथ्याःगु खः । ज्याझ्वलय् किपू नगरपालिकाया मेयर रमेश महर्जन, उपमेयर सरस्वति खड्का रिजालपिनिगु नं सहभागीता दुगु खः । ज्याझ्वः नगर कमिटीया अध्यक्ष विकास महर्जनया सभापतित्वय् जूगु खः ।
LEAVE YOUR COMMENTS