पास सुयात माः, सुयात म्वाः ?
येँ (नेपालभाषा टाइम्स)÷निर्वाचन आयोगं वइगु मंसिर ४ गते मतदान कुन्हु अत्यावश्यकीय सेवा बीत चले जुइगु सवारी साधनया नितिं पास आवश्यक मजुइगु व्यवस्था याःगु दु ।
आयोगं धाः कथं वकुन्हु एम्बुलेन्स, शववाहन, अस्पतालय् ज्या यायेमाःपिं चिकित्सक, स्वास्थ्यकर्मी लिसें ड्यूटीया कर्मचारी च्वना वनीगु गाडीया निंतिं पास कयाच्वनेम्वाः ।
उकथं हे लः ल्ह्यइगु ट्यांकर, दुरु ल्ह्यइगु गाडी, दमकल, दूरसञ्चार व केवल सेवाया सवारी साधनया नितिं नं पास कायेम्वाःगु खँ आयोगया सचिव गोकर्णमणि दुवाडीं कनादीगु दु ।
अथे हे आयोगं जारी याःगु म्हसीकापौ दुपिं पर्यवेक्षक, अवलोकनकर्ता, अनुगमन– कर्ताया सवारी सधानया नितिं नं अनुमति म्वाःगु खँ धाःगु दु । लिसें फोहोर ल्ह्यइगु गाडी, विदेशी पर्यटक जक ल्ह्यइगु वाउँगु नम्बर प्लेटया गाडी, सुरक्षा–कर्मीं छ्यलीगु सुरक्षा निकायया गाडी, कुटनीतिक नियोग, युएन एजेन्सी, निगू पक्षीय, बहुपक्षीय साझेदार संस्थाय् ज्या यानाच्वंपिं कर्मचारीया गाडीं नं पास कायेम्वाः ।
अशक्तपिं मनूतय् हकय् नं मत–दान याये अःपुकेत वडा कार्यालयया सिफारिसय् सम्बन्धित निर्वाचन अधिकृतं गाडी चले यायेगु अनुमति बी फइगु खँ धाःगु दु । उकथं हे पूर्ण अपाङ्गता जूपिं वा ‘क’ व ‘ख’ वर्गया अपाङ्गता दुपिनिगु हकय् नं परिचयपत्रया आधारय् सवारी साधन छ्यलेत अनुमति म्वाःगु खँ धाःगु दु ।
मजिमगाःगु अवस्थाय् सम्बन्धित निर्वाचन अधिकृतपाखें अनुमति कायेगु व्यवस्था याःगु दु । आपतकालीन अवस्थाय् धाःसा सम्बन्धित सीडीओं व्यवस्थापन याये फइगु खँ धाःगु दु ।
थ्वहे झ्वलय् मंसिर ४ गतेया वइगु निर्वाचनबारे आयोगं नेपालय् च्वंगु कुटनीतिक नियोगतय्त जानकारी याकूगु दु । आयोगं म्हिगः कुटनीतिक नियोगया प्रमुख व प्रतिनिधिपिंत निर्वाचनबारे जानकारी याकूगु खः ।
आयोगया ज्याकुथिइ याःगु ज्याझ्वलय् प्रमुख निर्वाचन आयुक्त दिनेशकुमार थपलियां प्रतिनिधिसभा व प्रदेशसभाया निर्वाचन स्वच्छ, स्वतन्त्र व पारदर्शी ढंगं यायेत आयोग प्रतिबद्ध दुगु व निर्वाचनया नितिं माःगु तयारी पूवनेधुंकूगु जानकारी बियादीगु खः । लिसें वय्कलं निर्वाचन सफलतापूर्वक यायेगु ज्याय् अन्तर्राष्ट्रिय समुदायया तिबः व ग्वाहालि माःगु खँ नं धयादीगु दु ।
ज्याझ्वलय् आयोगया उपसचिव कमल भट्टराईं निर्वाचनया नितिं सुरक्षा, आचारसंहिताा कार्यान्वयन, निर्वाचन अनुगमन व पर्यवेक्षकबारे जानकारी याकादीगु खः ।
भट्टराईं निर्वाचनया पर्यवेक्षण यायेगु नितिं स्वंगू थीथी अन्तर्राष्ट्रिय संस्था, ४४ गू राष्ट्रिय संस्थायात अधिकार बियागु व निर्वाचनय् ८ हजारम्ह पर्यवेक्षकत परिचालन जुइगु जानकारी याकादीगु खः । ज्याझ्वलय् कुटनीतिक नियोगया प्रतिनिधितय्सं चुनावय् मिसापिनिगु सहभागिता बारे जिज्ञासा तःगु खः ।
LEAVE YOUR COMMENTS