ने. सं. ११४४ कौलाथ्व चौथी -

प्रम ओली गणतन्त्र विरोधी- नेपाल

येँ- नेपाल कम्युनिष्ट पार्टी (नेकपा) या प्रचण्ड–नेपाल पुचःया अध्यक्ष माधवकुमार नेपालं प्रधानमन्त्री केपी शर्मा ओली गणतन्त्र विरोधी जूगु खँ धयादीगु दु । गणतन्त्र वइ मखु धकाः तत्कालीन एमालेया पार्टी बैठकय् ओलीं फरक मत तकं तःगु नेपालया धापू दु ।

थः सतिपिं प्रेस संगठनया भेलाय् सम्बोधन यायेगु झ्वलय् अध्यक्ष नेपालं धयादी, ‘ओली गणतन्त्र विरोधी खः, वय्कलं नेपालय् गणतन्त्र वइमखु धकाः पार्टीइ फरक मत नं तयादीगु खः ।’ उकथं हे अध्यक्ष नेपालं प्रतिनिधिसभा विघटन याइम्ह ओली प्रधानमन्त्रीया पदय् च्वने मजिउगु खँ धासें आः तक थःपिसं प्रतिनिधिसभा विघटन मजूनि धकाः वय्कःयात स्वीकार यानाच्वनागु खँ धासें धयादी, ‘प्रतिनिधिसभा विघटन जुइधुंकाः प्रम ओली कामचलाउ प्रधानमन्त्री जुइमाल वा प्रधानमन्त्रीया पद त्वःतेमाल ।

अध्यक्ष नेपालं प्रचण्ड व थःत प्रम ओलीं स्वाहाने जक दयेकूगु धासें धयादी, ‘वय्कलं प्रचण्ड व जितः स्वाहाने जक दयेकल, गज्याःम्ह मनूयात जिं प्रधानमन्त्रीया प्रस्ताव याना ?’ वय्कलं प्रम ओलीया व्यक्तिवाद विरुद्ध थःपिं आन्दोलनय् कुहां वयाच्वनागु खँ धासें धयादी, ‘प्रचण्ड व थः विश्वासया जगय् न्ह्यावनागु खँ कनादिसें नेकपा एमाले पार्टी संगठन दयेकेगु झ्वलय् नं प्रम ओलीया भूमिका मदुगु दावी नं यानादीगु दु ।

उगु हे ज्याझ्वलय् न्ववायेगु झ्वलय् नेकपाया मेम्ह अध्यक्ष पुष्पकमल दाहालं प्रतिनिधिसभा विघटन राजतन्त्र पुनस्र्थापना यायेगु योजनाया शुरुवात जूगु खँ धयादीगु दु ।

अध्यक्ष दाहालं थौंकन्हय् प्रधानमन्त्री ल्हानाच्वंगु भाय् राजसंस्था पुनस्र्थापनाया गन्ध वयाच्वंगु धासें धयादी, ‘प्रम ओलीया पलाः राजतन्त्रयात पुनस्र्थापन यायेगु व देय्यात निरंकुशतापाखें न्ह्याकेगु पलाःया शुरुवात खः । उगु पलाःयात गुगुं नं कथं पनेमाः ।’

थम्हं हे सफिारिस यानाम्ह प्रधानमन्त्रीं जनताय् निहित सार्वमौभसत्ताय् आक्रमण याःगुलिं थःके आवेग, घृणा व आक्रोस दुसां नं अधैर्य मजुयागु खँ धासें विधिप्रक्रियाया लँपुइ देय्यात यंकेगु कुतः यानाच्वनागु दावी नं यानादीगु दु । संसद भंग यानाः ओलीं देय्यात संविधानविहीन व तानाशाहीया लँपुइ यंकेत्यंगु द्वपं नं बिउगु दु ।