राष्ट्रपति पदय् एमाले–माओवादी तनाव

येँ (नेपालभाषा टाइम्स)-माओवादी केन्द्रं राष्ट्रपति ल्ययेगु लागिं राष्ट्रिय सहमति कायम यायेगु निर्णय याःगु दु । माओवादी स्थायी कमिटीया म्हिगः च्वंगु बैठकय् राष्ट्रिय सहमति कथं राष्ट्रपति ल्ययेमाःगु धापू पदाधिकारीतय्सं तःगु खः ।

बैठकय् माओवादी अध्यक्ष लिसें प्रधानमन्त्री पुष्पकमल दाहालं थः एमालेया प्रस्तावय् प्रधानमन्त्री जुयागु खःसां विश्वासया मत कायेगु इलय् कांग्रेस नं दुथ्याःगुु खँ कँसें आः राष्ट्रपति पदय् कांग्रेसया नं विश्वास कयाः गुकथं न्ह्याः वनेफइ धकाः न्ह्यसः तयादीगु खः ।

बैठकय् ब्वति काःपिं पदाधिकारीतय्सं कांग्रेसयात नं विश्वासय् कयाः सहमति मालेगु जिम्मा माओवादीयात वःगु धासें आः उकथं हे न्ह्याःवनेत अध्यक्ष दाहालयात सुझाव बिउगु खः । थ्व स्वयां न्ह्यः एमाले अध्यक्ष केपी ओली शर्मा व प्रम दाहाल दथुइ जूगु सहमतिइ राष्ट्रपति व सभामुख एमालेयात बीगु समझादारी जूगु खःसा ओलीं राष्ट्रपतिइ एमालें बिउम्ह मनू हे त्याके माःगु माग याना वयाच्वंगु खः ।

माओवादी केन्द्रं याःगु थ्व निर्णय लिपा एमाले व माओवादी दथुइ हाकनं तनाव ब्वलनीगु सम्भावना अप्वःगु खँ धाःगु दु । राष्ट्रपति पदया विषयय् एमाले अध्यक्ष ओली थः हे वालुवाटार वनाः खँ ल्हायेधुंकूगु दुसां सहमति धाःसा जुइ मफुगु खः । विशिष्ट सूत्रतय्सं आः राष्ट्रपति पदया खँयात कयाः माओवादी व एमालेया थ्व गठबन्धन त्वाःदले फुगु अनुमान समेत यानाहःगु दु ।

सम्बन्धित बुखँ

LEAVE YOUR COMMENTS