अनिवार्य प्यानं चीधंपिं व्यापारीतय्त समस्या
येँ – येँया ह्युमतय् च्वंगु छगू खुद्रा पसलय् होलसेलं चुरोट बीम्ह मनू वल । पसलय् वयाः चुरोट माः कि म्वाः न्यन । पसल्यां चुरोट माः धाल । बिक्रेतां न्यन, ‘प्यान नम्बर दु कि मदु ?’ पसल्यां मदु धाल । बिक्रेता चुरोट मबिसे वन । पसल्या छझाः जिल्ल जुल । ‘छु याये, पसःया बाः हे झिंन्याद्वः पुलेमाः ।
आः हाकनं सरकारयात कर पुलेत गनं काःवनेगु ?’ उम्ह पसल्याया कथं थौंकन्हय् प्यान नम्बर मदयेक छुं नं होलसेल बिक्रेतां खुद्रा व्यापारीयात सामान बियाच्वंगु मदु । अथे जुयाः आः खुद्रा पसःत खाली जुइगु अवस्था वयाच्वंगु दु । सरकारं साउन १ गते निसें द्वःछि स्वयां अप्वःया कारोबार यायेगु खःसा प्यान नम्बर कायेमाःगु व्यवस्था यायेवं खुद्रा पसःत समस्याय् लाःगु दु ।
प्यान मदुपिंत होलसेलं सामान बीगु बन्द याना बिउगु खः । ह्युमतया हे मेम्ह व्यापारी हरि महर्जनं धाःसा थम्हं प्यान नम्बर कयातयागु खःसां नं व्यापार याये फइगु अवस्था मदुगु खँ कनादीगु दु । वय्कःया कथं प्यान नम्बर कायेधुंकाः दँय् ५० लाख तकया कारोवार याये दु । वयां अप्वः जुल धाःसा भ्याटय् वनेमाः ।
भ्याटय् वनेगु सामथ्र्य थःके मदुगु खँ वय्कलं कनादिल ।वय्कलं प्यान नम्बर नवीकरण मयाःगु हे निदँ दयेधुंकल । नवीकरण यायेत राजश्व कार्यालयय् थम्हं हे कम्प्युटर इन्ट्री यायेमाः । कम्प्युटर चले याये मसयाः निदँ दतं नं नवीकरण याये फयाच्वंगु मदुनि ।
वय्कलं धयादी, ‘न्हापा निदँ तक राजश्व कार्यालयं वइपिं मनूतय्त धयाः इन्ट्री याका, आः अज्याःपिं मनूत नापलाये थाकुल, अथे जुयाः जिं निदँ दत नवीकरण मयानानि ।’मेखे नेपाल खुद्रा व्यापार संघया पुलांम्ह अध्यक्ष पवित्र वज्राचार्यं भन्सार विन्दु व उत्पादन क्षेत्रं हे सफा जुयाः वल धाःसा प्यान दर्ता यानाः पसः तयेत समस्या मजुइगु खँ कनादिल ।
तर चीधंगु खुद्रा व्यापारीयात प्यान दर्ता या धायेगु पाय्छि मजुइगु खँ वय्कलं कनादिल । ‘नेपालभाषा टाइम्स’ लिसे खँ ल्हासें वय्कलं भन्सार विन्दुइ हे अन्डर इनभ्वाइस जुयाः सामान आयात जुयाच्वंगुलिं समस्या पिहां वयाच्वंगु खँ कनादिल ।
फुक्क थासं सफा जुल धाःसा प्यान नम्बर कयाः व्यापार यायेत समस्या मजूगु खँ कँसें वय्कलं सरकारं आवश्यक ई बियाः थःगु योजना लागू यायेमाःगु बिचाः नं तयादिल । उकथं हे नेपाल खुद्रा व्यापार संघया अध्यक्ष राजकुमार श्रेष्ठं चीधंगु खुद्रा व्यापारीयात प्यान का धायेगु उचित मजूगु खँ कँसें थःपिंसं उकिया बारे सरकारलिसे सहलह यानाच्वनागु जानकारी बियादिल ।
खुद्रा व्यापारीया बारे सरकारयात सुझाव बीधुनागु व याकनं हे उकिया लिच्वः पिहां वइगु आशा नं वय्कलं प्वंकादीगु दु ।थ्वहे झ्वलय् थौं नेपाल उद्योग वाणिज्य महासंघ, नेपाल चेम्बर्स अफ कमर्स व उद्योग परिसंघ दुने नं अनिवार्य प्यान नम्बर लागू यायेगु बारे सहलह जुइत्यंगु खँ सीदुगु दु ।
LEAVE YOUR COMMENTS