कांग्रेसयात हे प्रमुख प्रतिपक्षी दलया मान्यता

येँ (नेपालभाषा टाइम्स)÷संघीय संसद सचिवालयं नेपाली कांग्रेसयात प्रमुख प्रतिपक्षी दलया मान्यता बिउगु दु । सचिवालयं कांग्रेस संसदीय दलया कार्यालययात पौ च्वयाः संसदीय दलया नेता शेरबहादुर देउवायात विपक्षी दलया नेताया हैसियतय् सुविधा वइगु जानकारी याकूगु खः ।  थ्व स्वयां न्ह्यः कांग्रेसं संसद सचिवालययात पौ च्वयाः पार्टीया विपक्षी दलया मान्यता थःगु पार्टीयात बियाः सेवा सुविधा बीत माग याःगु खः ।

प्रधानमन्त्री पुष्पकमल दाहालया सरकारयात विश्वासया मत बीवं कांग्रेस प्रमुख विपक्षी दल जुइ मखु धकाः बहस जुयाच्वंगु खः । तर संसद सचिवालयं छ्वःगु पतिइ कांग्रेसयात हे विपक्षी दलया
सेवा सुविधा बीगु खँ न्ह्यथनातःगु दु ।

कांग्रेसं सरकारयात विश्वासया मत बीधुंकाः प्रमुख विपक्षी दल जुइगु आधार मदु धासें नेमकिपाया सांसद प्रेम सुवालं सदनय् न्ह्यसः थंगु खःसा नेमकिपायात प्रमुख प्रतिपक्षी दल दयेकेमाःगु माग नं याना वयाच्वंगु खः ।

प्रमुख प्रतिपक्षी दलया परिभाषा व दइगु सेवा सुविधाया बारे संघीय संसदया पदाधिकारी तथा दुजःपिनिगु पारिश्रमिक व सुविधा सम्बन्धी ऐन २०७३ य् न्ह्यथनातःगु दु । उगु ऐनया दफा २ या (ङ) स विपक्षी दलया परिभाषा यानातःगु दु । उगु दफाय् धयातःगु दु, ‘मन्त्रिपरिषद् गठन यायेगु वा मन्त्रिपरिषद्या गठन यायेत समर्थन याइगु दल बाहेक प्रतिनिधिसभा व राष्ट्रियसभाय् १० प्रतिशत वा व स्वयां अप्वः दुजः दुगु दल मध्ये दकलय् अप्वः दुजः दुगु दल विपक्षी दल जुइ ।’

प्रमुख प्रतिपक्षी दलया दावी यानाच्वंगु नेमकिपायाके १० प्रतिशत सांसद मदु ।

सम्बन्धित बुखँ

LEAVE YOUR COMMENTS