देउवा विरुद्ध कोइराला खेमाया मोर्चाबन्दी
येँ (नेपालभाषा टाइम्स)- वंगु आम चुनाव व वयां लिपा सरकार गठनया सवालयात कयाः नेपाली कांग्रेस दुने विवाद शुरु जूगु दु । खास यानाः चुनाव व वयां लिपा सरकार याइगु इलय् कांग्रेस सभापति शेरबहादुर देउवां म्हितादीगु भूमिकायात कयाः पार्टी दुनेविवाद ब्वलंगु खःसा आः थ्वहे खँयात कयाः वय्कःया विरोधी खेमां आक्रमण नं शुरु याइगु सम्भावना ब्वलंगु दु ।
थ्व झ्वलय् कांग्रेसया वरिष्ठ नेता शेखर कोइरालां प्रधानमन्त्री पुष्पकमल दाहालयात विश्वासया मत बियाः कांग्रेसं गल्ती याःगु बिचाः प्वंकादीगु दु ।
म्हिगः देउवा विरोधी गुटया नेता कार्यकर्तालिसे सहलह यायेगु झ्वलय् वय्कलं उगु खँ धयादीगु खः । सहलहया झ्वलय् नेता कोइरालां अल्पमतं तःगु सुझाव नेतृत्वं मन्यंगु कारणं हे समस्या जूगु खँ धयादीगु खः ।
वय्कलं प्रधानमन्त्रीं फ्वंगु विश्वासया मत विभाजनया झ्वलय् नेपाली कांग्रेस तटस्थ च्वनेमाः धकाः थम्हं कार्यसम्पादन समितिइ सुझाव बियागु खःसां नं उकिया सुनुवाइ मजूगु खँ धयादिल। वय्कलं धयादिल,
‘बहुमतया निर्णय माने यायेमाःगु बाध्यता जुल, विश्वासया मत बी मजिउगु खः ।’
कोइराला पुचलं लिपांगु राजनीतिक अवस्था बारे आः निरन्तर सहलह यानाच्वंगु दु । कांग्रेसया आः सत्ता पक्ष खः कि प्रतिपक्षी धइगु न्ह्यसः नं ब्वलनाच्वंगुलिं थथे बैठक यायेमाःगु खँ धाःगु दु । म्हिगःया बैठकय् न्ववाःपिं नेतातय्सं कांग्रेसं प्रधानमन्त्री दाहालयात बियागु विश्वासया मत लित कायेमाःगु सः नं तःगु खः ।
बैठकय उपसभामुख उम्मेदवार सांसद मुक्ताकुमारी यादवं प्रधानमन्त्रीयात बिउगु विश्वासया मत तत्काल लित कायेमाःगु खँ धयादीगु खः । यादवं धयादिल, ‘गुम्हलसे जुयाच्वंगु सहकार्य त्वाःथल, तत्काल सहकार्यया सम्भावना नं मदु, वयात विश्वासया मत बीगुया अर्थ छु खः ? झीपिं सत्तापक्ष मजुइधुंकाः विश्वासया मत बीगुया छु अर्थ ?’
आः पार्टी दुने सभापति विरुद्ध गुकथं न्ह्याः वने माली धकाः सहलह यायेत उगु बैठक च्वंगु खः ।
LEAVE YOUR COMMENTS