मुक्ति मोर्चां प्रा. श्रेष्ठयात हन

येँ- नेवाः राष्ट्रिय मुक्ति मोर्चां वामपन्थी आन्दोलनलिसें नेवाः न्ह्यलुवा प्रा. माणिकलाल श्रेष्ठयात हनेज्या याःगु दु । मोर्चाया नकतिनि क्वचाःगु स्वक्वःगु राष्ट्रिय सम्मेलनय् हे प्रा. श्रेष्ठयात हनेज्या याःगु खःसां अबलय् वय्कः स्वास्थ्यया कारणं ज्याझ्वलय् उपस्थिति जुयामदीवं छेँय् वनाः वय्कःयात हनापौ लःल्हाःगु खः ।

मोर्चाया छगू प्रतिनिधिमण्डल वय्कःया छेँय् वनाः हनापौ लःल्हाःगु खःसा मोर्चाया नायः पवनमान श्रेष्ठं हनापौ लःल्हानादीगु खः । नेपाःया वामपन्थी आन्दोलनया न्ह्यलुवालिसें वामपन्थी बुद्धिजीवी, नेवाः व आदिवासी जनजातिया आन्दोलनया नं न्ह्यलुवालिसें मोर्चाया संरक्षक तकं जुयाच्वनादीम्ह प्रा. श्रेष्ठं बियादीगु योगदानया कदर यासें मोर्चां हनेज्या याःगु खः ।