संखुवासभाय् नेवाः बाजं संरक्षण सुरु

येँ – संखुवासभाया खाँदवारीइ नं नेवाः बाजं व परम्परागत भजन संरक्षणया निंतिं नेवाः समुदाय जाया च्वंगु दु । थुकिया निंतिं खाँदवारीया शाक्य समाजं पहल यानाच्वंगु दु । समाजया पहलय् न्हू पुस्तायात बुसां निसें मृत्यसंस्कार तकया इलय् हालीगु म्येँ स्यनाच्वंगु दु ।
समाजया अध्यक्ष किरण शाक्यं रासस लिसे खँ ल्हासें धर्म, संस्कृति व बाजं संरक्षण यायेगु निंतिं थःपिं लगे जुयाच्वनागु खँ धयादीगु दु । बाजं थायेगु कला ल्याय्म्ह पुस्तायात हस्तान्तरण जुइमफयाच्वंगु खँ कनादिसें समाजया उपाध्यक्ष जयन्द्र शाक्यं थःपिंसं थुकिया निंतिं पहल यानाच्वनागु खँ कनादिल ।
खाँदवारी जक स्वसलं मल्याक शाक्य समुदाय परिवार च्वनाच्वंगु दु । आः भजन व बाजं संरक्षणया निंतिं धिमे बाजं व तबलाया लिसें भजन स्यनेगु ज्या जुयाच्वंगु दु । अथेहे समाजं थुगुसीया स्वांयाः पुन्हि त्रिरत्न बुद्ध विहारय् हनेगु नं क्वःछिउगु दु ।