गुथि अस्ट्रेलियाया प्यक्वःगु मंकाः इहि
येँ (नेपालभाषा टाइम्स)÷ गुथि अस्ट्रेलिया ग्वसालय् प्यक्वःगु मंकाः इहि क्वचाःगु दु । वंगु डिसेम्बर १ तारिखय् अस्ट्रेलियाया सिड्नी शहरय् इहि मुना ज्याझ्वः जूगु खः ।
ज्याझ्वलय् गुरुजु करुण वज्राचार्यं नेवाः संस्कृति व परम्पराकथं इहिया ज्याझ्वः क्वचायेकादीगु खः । ज्याझ्वलय् नवासें वय्कलं वइगु दँय् नं थुकथं हे मंकाः इहि यायेगु ग्वसाः दुगु जानकारी बियादिसें थुगुसी सिड्नी जूगु मंकाः इहि मुना ज्याझ्वःयात वइगु दिनय् भिक्टोरिया व क्वीन्सल्याण्ड शहरय् नं विस्तार याना यंकेगु योजना दुगु नं जानकारी बियादिल ।
नेवाः समुदाय दुने मिसातय्त याइगु प्रमुख संस्कारमध्ये छगू इहि नं छगू खः । परम्परागत रीतिथिति झीगु संस्कार दुने अतिकं महत्वपूर्ण जूगु व थज्याःगु ज्याझ्वलं संस्कृतिइ खने दयाच्वंग हिउपाःया दूरीयात म्हो याये फइगु विश्वास नं वय्कलं प्वंकादिल ।
संस्थाया संस्थापक पदम शाक्यं दशकौं तक थःगु मातृभूमि त्वःता वःसां नं समुदायय् च्वंपिंसं सांस्कृतिक परम्परा हना वयाच्वंगु तसकं च्वछायेबहजू धयादिल । थःगु समुदायया विशिष्टता, विविधता व समृद्ध रीतिथिति संस्कार मेमेगु समुदायय् नं म्हसीका बी खंगुलिं झीसं गर्व यायेमाः धयादिल ।
निवर्तमान नायः शिव श्रेष्ठं नेवाः समुदायया संस्कृति देय्या सिमाना पिने नं थ्यंके हनाच्वंगुलिं लसता प्वंकादिल । अभियन्ता श्याम सैंजूं झीसं लिपाया पुस्तायात गर्व याये फइकथं इमि पूर्खापिंसं गज्याःगु संस्कृति परम्परा त्वःता वन धकाः जानकारी बीगु कुतः यायेमाः धयादिल ।
अनुपमान महर्जनया नेतृत्वय् न्हूगु ज्यासना पुचः वयेधुंकाः जूगु थ्व न्हापांगु ज्याझ्वः नं खः ।
LEAVE YOUR COMMENTS