थँहिति मानन्धरतय् स्वदँया दँमुँज्या

येँ – थँहिति मानन्धर गुथियार समाजया दँमुँज्या वंगु शनिवाः फंंपि छगू ज्याझ्वःया दथुइ क्वचाल ।बौद्ध विद्वान ई. गुह्येश्वरी राज मानन्धर मूपाहां कथं झायादीगु उगु दँमुँज्या नीक्वःगु, नीछक्वःगु व नीनिक्वःगु यानाः मुक्कं स्वदँया दँमुँज्या जूगु खः ।

गुथिया अध्यक्ष लक्ष्मीदास मानन्धरया सभापतित्वय् न्ह्याःगु ज्याझ्वलय् सचिव गौतम मानन्धरं प्रगति विवरण व कोषाध्यक्ष कृष्णप्रसाद मानन्धरं आर्थिक प्रतिवेदन, सांस्कृतिक सचिव बद्रिनारायण मानन्धरं सांस्कृतिक प्रतिवेदन, सनाः गुथिया स्वदँया ल्याःचाः गणेश साय्मिं न्ह्यब्वयादीगु खः ।

ज्याझ्वलय् मदुम्ह कजि रत्नबहादुर मानन्धर व धर्मबहादुर मानन्धरया नामं स्वनातःगु अक्षय कोषपाखें ०७१ दँया एस.एल.सी परीक्षाय् ताःलाःपिं समाजया दुजःपिनि काय÷म्ह्याय्पिंमध्ये न्हाप लाःपिं रित मानन्धर व रिमा मानन्धर, ०७२ दँया एस.एल.सी परीक्षाय् न्हाप लाःपिं सोमेश मानन्धर व प्रलिसा मानन्धर अथे हे ०७३ दँया एसईई परीक्षाय् न्हाप लाःपिं अनिष मानन्धर व तथाता खुशि मानन्धरपिंत म्हतिं न्याद्वः तका, तक्मा व हना–पौ बियाः हनेगु ज्या याःगु खः ।

ज्याझ्वलय् समाजया जः ई दिनेश मानन्धरं पि.एच.डी व स्मृति मानन्धरं एम.वी.वी.एस. पासा यानादीगुलिं वय्कःपिंत नं तक्मा व हना–पौपाखें सम्मान याःगु खःसा गुंला धर्मय् व मेमेगु थीथी नखःचखः नापं जात्राय् थःगु संस्कृति न्ह्याका यंकेगु निंतिं ग्वाहालि याना वयाच्वंपिं गुथिया मस्तय् नगद नापं तक्मा लःल्हाना हनेगु ज्या नं जूगु ।