आः आपंगता जूपिंसं नं सगरमाथा गये खनीगु
येँ – विश्वया सर्वोच्च शिखर सगरमाथाया च्वकाय् पलाः तयेगु यक्वसिया म्हगस दयेफु। तर थ्व म्हगस सकसियां पूवनी धइगु मदु। उकिसनं अपांग जूपिंसं सगरमाथा गयेगु म्हगस हे जक खंकेगु बाहेकं मेगु छुं जुइमखु।तर आः वयां अपांग जूपिंसं नं सगरमाथा गयेगु थःगु म्हगस पूवंके खनीगु जूगु दु। सर्वोच्च अदालतं अपांग जूपिंसं नं सगरमाथा आरोहण याये दइगु फैसला यायेवं शारीरिक रुपं असक्त जूपिंसं नं थःगु म्हगस साकार यायेगु लँपु चाःगु खः।
सर्वोच्चया कामु प्रधानन्यायाधिश दीपकराज जोशी, न्यायाधिशपिं ओमप्रकाश मिश्र, चोलेन्द्र शम्शेर जबरा, दीपकराज कार्की व केदारप्रसाद चालिसेया संवैधानिक इजलासं आवंलिं शारीरिक रुपं असक्त जूपिंसं नं सगरमाथा गये दइगु फैसला याःगु खः।
थ्व स्वयां न्ह्यः पर्वतारोहण सम्बन्धी नियमावली–२०५९ लय् निपां ल्हाः मदुपिं वा निपां तुति मदुपिं वा निगलं मिखां मखंपिंत सगरमाथा आरोहणया अनुमति मबीगु धइगु व्यवस्था यानातःगु खः। नियमावलीइ उकथंया व्यवस्था यानातःसां नेपाःया संविधानकथं मौलिक हक अन्तर्गतया समानताया हक लिसे ल्वाःगु विषय जूगु धासें उगु नियमावली खारेज जूगु सर्वोच्चया फैसलाय् धयातःगु दु।
सर्वोच्चय् थगुने फागुन १४ गते अपांगता जूपिंसं नं सगरमाथा आरोहण याये दयेमाः धइगु माग यासें रिट दायर जूगु खः। नेपाल पत्रकार महासंघया केन्द्रीय दुजः माधव चम्लागाइँयापाखें भानु निरौलां पर्वतारोहण सम्बन्धी नियमावलीइ जुयाच्वंगु व्यवस्था खारेज यायेमाःगु माग यासें सर्वोच्चय् रिट दायर याःगु खः।
सर्वोच्चं जारी याःगु अन्तरिम आदेशय् नियमावलीइ अपांगता जूपिंत पर्वतारोहणया अनुमति मबीगु धकाः जुयाच्वंगु संशोधन तत्कालया निंतिं कार्यान्वयन मयायेत व मयाकेत नं आदेश बियातःगु दु।
LEAVE YOUR COMMENTS