फिनल्याण्डया नगर जनप्रतिनिधिइ नेवाः म्ह्यायमचा निर्वाचित

येँ- फिनल्याण्डया हेलसिन्की नगरपालिकाया चुनावय् नेपाःया म्ह्याय्मचा ब्योमा ताम्राकार निर्वाचित जुयादीगु दु । ताम्राकार हेलसिन्की नगरपालिकाया डेपुटी काउन्सिलर पदय् निर्वाचित जुयादीगु खः ।

वंगु सोमवाः जूगु चुनावी प्रक्रियाय् निक्वःगु कार्यकालया निंतिं ताम्राकार निर्वाचित जुयादीगु खः । स्थानीय तवरय् बांलाक ज्या याःगुलिं हेलसिन्कीया नगरवासीतय्सं चुनावय् ताम्राकारयात त्याकेगु ल्याखं मत बिउगु खः । मुक्कं ६२६ मत प्राप्त यानाः प्यदँया कार्यकालया निंतिं वय्कः निक्वःखुसी उगु पदय् निर्वाचित जुयादीगु खः ।

निर्वाचित जुयादी धुंकाः वय्कलं फिनल्याण्डय् च्वनाच्वंपिं नेपाःमितयुत आप्रवासीया समस्या, शिक्षा, स्वास्थ्य लगायत छुं नं आधारभूत व मेमेगु समस्या जुइ जुइके मबीकथं ज्या यायेगु प्रतिवद्धता प्वंकादीगु दु ।

झ्ण्डै निगू दशक न्ह्यवंनिसें फिनल्याण्डय् च्वना वयाच्वंम्ह ताम्राकार वरिष्ठ संचारकःमिलिसें समाचारवाचिका कृष्णा ताम्राकारया म्ह्याय् खः ।