न्हूदँया लसताय् जातीय महासंघया भिंतुना ज्याझ्वः

येँ- स्वन्ति नखः व नेपाल संवत् ११४२ न्हूदँया लसताय् भिंतुना कालबिल ज्याझ्वः जुल । नेवाः जातीय महासंघया ग्वसालय् स्वन्ति नखः व नेपाल संवत् न्हूदँ ११४२या लसताय् उगु ज्याझ्वः जूगु खः ।

ज्याझ्वलय् येँ महानगर प्रमुख विद्यासुन्दर शाक्ययात मूपाहांकथं ब्वनातःगु खःसां स्वास्थ्यया कारणं उपस्थित जुया मदीवं महासंघया नायः मनोज नेवाः खड्गीं त्वाःदेवाय् मत च्याकाः ज्याझ्वःया उलेज्या यानादीगु खः ।

महासंघया लोगो नं सार्वजनिक याःगु ज्याझ्वलय् नवासें नायः खड्गीं जातया खँ ल्हात वा नां जक काल धाःसां साम्प्रदायिक जुल धइगु द्वपं बीगु यानाच्वंगु धासें थुकथंया प्रवृत्तिपाखें मुक्त जुयाः न्ह्याः वनेमाःगु दु धयादिल ।

जातीय समाजया प्रतिनिधित्व यासें राजोपाध्याय समाजया नायः संजय शर्मा राजोपाध्यायं सकल नेवाः जातजातिया शक्तियात छप्पँ यानाः संगठित रुपं नेवाः समाजयात न्ह्यःने यंकेमाः धयादिल ।

ज्याझ्वलय् संचारकःमि पदम श्रेष्ठं च्वयादीगु ‘जातजाति र संघीयता ः कति ठीक कति बेठीक’ नांया सफू नं महासंघया पदाधिकारीलसें जातीय संगठनया पदाधिकारीपिंसं मंकाःकथं पितब्वज्या यानादीगु खः ।