ब्वनेकुथिया शैक्षिक सुधारय् महानगर

येँ(नेपालभाषा टाइम्स)- येँ महानगरपालिकां सामुदायिक ब्वनेकुथिया शैक्षिक गुणस्तर सुधारया क्रमय् दुगु खँ धाःगु दु । महानगरपालिकां थःगु मातहतय् दुगु सामुदायिक ब्वनेकुथिया शैक्षिक गुणस्तर सुधार यायेगु क्रमय् दुगु धाःगु खः ।

महानगरया शिक्षा विभाग प्रमुख सीताराम कोइरालां दक्वं सामुदायिक ब्वनेकुथियात ब्वँमि व अभिभावकया आकर्षणया केन्द्र दयेकेगु व उकिया निंतिं निजी ब्वनेकुथिया शिक्षाया गुणस्तर स्वयां म्हो वयेके बीगु जुइमखु धयादीगु दु । भौतिक संरचना निर्माणया निंतिं ज्या जुयाच्वंगु नापं म्हो ब्वँमि दुगु ब्वनेकुथिया हकय् ब्वँमिया ल्याः अप्वयेकेगुपाखे नं महानगरं ध्यान बियाच्वंगु वय्कःया धापू दु ।

भौतिक संरचना व गुणस्तरीय शिक्षाया कारणं जनकल्याण, शिवपुरी, रत्नराज्य मावि, पद्मकन्या मावि, पद्मोदय, विश्व निकेतन, सरस्वती निकेतन ज्ञानोदय आदि ब्वनेकुथिइ थप ब्वँमिपिं ब्वंकेत थाय् मदुगु व वइगु दिनय् मेमेगु ब्वनेकुथियात नं थुकथं हे दयेकेगुयोजना दुगु महानगरं न्ह्यथंगु दु ।

महानगरं तत्काल शिक्षा नीति हयेगु तयारी यानाच्वंगु जानकारी बियादिसें शिक्षा नीति वयेवं शिक्षा ख्यलय् सकारात्मक हिउपाः वइगु वय्कलं धयादीगु दु । येँ महानगर दुने मुक्कं ८९ गू सामुदायिक ब्वनेकुथि संचालन जुयाच्वंगु दुसा उकी ५९ गू माध्यमिक व मेगु आधारभूत विद्यालय खः ।