ततःधंगु आयोजना बिना प्रतिस्पर्धा चिनियाँ कम्पनीतय्त

येँ – सरकारं बाहिरी चक्रपथ दयेकेगु ज्या प्रतिस्पर्धा मयासे हे चिनिया कम्पनीयात बीगु तयारी याःगु दु । थथे प्रतिस्पर्धा हे मयाकुसे चिनियाँ कम्पनीतय्त धमाधम ततःधंगु आयोजना बियाहःगु खँय् विज्ञतय्सं धाःसा चिन्ता प्वंकाहःगु दु । विनाप्रतिस्पर्धा आयोजना ठेक्का बिइगु ज्यां आयोजनाया लागत अप्वयेकीगु व नीतिगत अराजकता वइगु खँय् उमिसं चिन्ता प्वंकाहःगु खः ।

सरकारं आः आः १२ सय मेगावाटया जलाशययुक्त बुढीगण्डकी जलविद्युत आयोजना व येँया बाहिरी चक्रपथ नं चिनियाँ कम्पनीतय्त हे दयेके बीगु तयारी यानाहःगु दु । परियोजनाया निंतिं ध्यबा मुंकेगु माःगु अवस्थाय् दातृ राष्ट्र लिसे द्विपक्षीय सम्झौता यानाः थथे प्रतिस्पर्धा हे मयासे दात राष्ट्रया कम्पनीया कम्पनीयात ठेक्का बीफइगु प्रावधान दु । थ्व हे प्रावधान कथं बुढीगण्डकी व बाहिरि चक्रपथ विनाप्रतिस्पर्धा चिनियाँ कम्पनीतय्त बीत्यंगु खः ।

मन्त्रिपरिषदया बैठकं बुढी गण्डकी आयोजना चिनियाँ कम्पनी गेजुवायात बीगु निंतिं वार्ता न्ह्याकेत ऊर्जा मन्त्रालययात निर्देशन बिइधुंकूगु दु । अथेहे बाहिर चक्रपथ नं चिनियाँ कम्पनीयात हे दयेके बीगु निंतिं प्रक्रिया न्ह्यायेधुंकूगु खँ सहरी विकासमन्त्री मोहम्मद इश्तियाक राई बिबिसीयात कनादीगु दु । वय्कःया कथं थ्व आयोजना चीन सरकारया लगानी दुगु चाइना एनर्जी इन्जिनियरिङ कर्पोरेशनयात दयेके बीगु निंतिं प्रक्रिया न्ह्यायेधुंकूगु दु ।

वय्कःया कथं चाइना एनर्जीं डिपीआरतकं सितिकं यानाबी धाःगुलिं सहरी विकास मन्त्रालयं अर्थमन्त्रालययात प्रारम्भिक सहमतिया निंतिं प्रस्ताव छ्वःगु खः । आः कानुन व अर्थ मन्त्रालयं सहमति बिल धाःसा मन्त्रिपरिषदं स्वीकृत यानाः थुकियात नं चिनियाँ कम्पनीयात बीगु निंतिं ज्या न्ह्याःवनी ।

थथे विनाप्रतिस्पर्धा ततःधंगु आयोजना विदेशी कम्पनीयात बियाच्वंगु खँय् चिउताः प्वंकादिसें जलस्रोत विज्ञ रत्नसंसार श्रेष्ठं बिबिसीयात धयादीगु दु, ‘पारदर्शी प्रतिस्पर्धा मयायेगु धयागु आर्थिक अराजकताया परिचायक खः । आर्थिक अराजकता दइबलय् अनियमितता जुइगु यक्व सम्भावना दु ।’ सार्वजनिक खरिद कार्यालयया पुलांम्ह सचिव रमेशकुमार शर्मां नं बिबिसीलिसे खँ ल्हासें अत्यावश्यक परियोजनाय् जक थज्याःगु प्रक्रिया नालेमाःगु सुझाव बियादीगु दु ।