थः विरुद्धया र्यालीइ ब्वति काल धकाः बालेनं पार्किङ बन्द यानाबिल
येँ (नेपालभाषा टाइम्स)- थः विरुद्ध जूगु कार्यक्रमय् ब्वति काल धकाः येँ महानगरपालिकाया मेयर बालेन साहं थनया दरवारमार्गय् तयातःगु पार्किङ बन्द याना बिउगु दु ।
महानगरपालिकां तिख्यलय् दयेकेत्यंगु पार्किङया विरोधय् म्हीग ‘अकुपाई टुँडिखेल’पाखें याःगु घेराउ ज्याझ्वलय् दरवारमार्गय् पार्किङया ठेक्का कयातःम्ह व्यवसायी रवि तण्डुकारं नं ब्वति काःगु जुयाच्वन ।
विरुद्ध जूगु अज्याःगु ज्याझ्वलय् ब्वति काल धकाः तम्वःम्ह मेयर बालेन साहं म्हिगः आकाझाकां तण्डुकारं ठेक्का कयातःगु दरवारमार्गया पार्किङ हे बन्द याना बिउगु खँ धाःगु दु ।
मेयर साहया मौखिक आदेशं म्हिगः दरवारमार्गय् नगर प्रहरी पाः तयाः पार्किङ बन्द याना बिउगु खः । अन पार्किङ बन्द याःगु बारे ट्राफिक प्रहरीयात तकं जानकारी मदुगु खँ धाःगु दु ।
महानगरपालिकां आकाझाकां पार्किङ बन्द याना बिउगुलिं उगु लागाय् थिकयेक बाः पुलाः पसः चायेकाच्वंपिं पसल्यातय् व्यवसाय प्रभावित जुइगु खँ धाःगु दु । थुकिं यानाः थःपिनि व्यवसाय चौपट जुइगु खँ स्थानीय व्यवसायीतय्सं धाःगु दु ।
अथे हे दरवारमार्गय् पार्किङया जिम्मा कायेगु लागिं महानगरपालिकालिसे कानून बमोजिम सम्झौता याना तःगु दु । तर मेयर साहं अज्याःगु सम्झौताया पालना मयासे तंया झोंकय् पार्किङ बन्द याना बिउगुलिं कानुनी व्यवस्था व नीति नियमया समेत उल्लंघन जूगु खँ नं धाःगु दु ।
येँ मनपां बागबजारया लँ सिथय् तयातःगु पार्किङ नं चीका छ्वयेवं अन पसः दुपिं व्यापारीतय्त तसकं मर्का जूगु खँ धाःगु दु । अन पार्किङ चीकेगु ज्या जूबलय् स्थानीय व्यवसायीतय्सं नं प्रतिरोध याःगु खः ।
निर्वाचन आयोग विरुद्ध बालेनया रिट
येँ मनपाया मेयर बालेन साहं निर्वाचन आयोगया बं पुइकेगु निर्णय विरुद्ध सर्वोच्च अदालतय् रिट तयादीगु दु । क्वःछिनातःगु तिथि दुने निर्वाचन खर्च बुझे मयाःगु धासें आयोगं साहयात नं बं पुइकेगु निर्णय याःगु खः ।
मेयर साहं दायर याःगु रिटय् धयातःगु दु, ‘जि निवेदकं सुइन्हुया म्यादया लिपांगु न्हि कुन्हु विदा जूगुलिं वयां लिपा अड्डा खुले जूगु न्हापांगु न्हि कुन्हु विवरण पेश यानागु खः । आयोगं महानगरपालिकाया प्रमुख पदया उम्मेदवारं याये दइगु खर्चया हद ७ लाख ५० हजार तक क्वःछिनातःगु खःसां जि निवेदकं धाःसा मुक्क ३ लाख ९४ हजार ४८९ जक खर्च यानाः उकिया विवरण पेश यानागु खः ।’
उकथं हे मेयर साहं इलय् खर्च विवरण बुझे यायेधुंकाः नं ७ लाख ५० हजार जरिवाना पुइकेगु, स्थानीय चुनावय् भाग काःपिं देय्न्यंकंया १ लाख २३ हजार उम्मेदवारयात एकमुष्ट जरिवाना यायेगु व खुलाया दुने बुझे मयात धाःसा खुदँ तक गुगुं नं निर्वाचनय् ब्वति काये मदइगु व निर्वाचित जुल धाःसा पदमुक्त जुइ धकाः याःगु निर्णय नं बदर यायेत माग यानादीगु दु ।
LEAVE YOUR COMMENTS