ज्यापु संस्कृतिया लागिं छगू करोडया कोष

नेपालभाषा टाइम्स
???? ??????? पारू
- नेवाःख्यः
किपा-सुगत रत्न सिन्दुराकार

येँ (नेपालभाषा टाइम्स) – ज्यापु संस्कृति विकास कोषं ज्यापु दिवस हनेगु निंतिं दयेकेत्यंगु छगू करोड तकाया कोषय् सरकारपाखें मगाःगु ध्यबा तया बीगु जूगु दु । ज्यापु दिवसया लसताय् बुधवाः कोषपाखें याःगु विशेष ज्याझ्वलय् मूपाहांया थासं न्ववासें उपप्रधानमन्त्री ईश्वर पाखरेलं थ्व खँ धयादीगु खः । कोषया अध्यक्ष मंगलकृष्ण सिंहं कोषय् आः ६० लाख तका खायेधुंकूगु व थःपिंसं छगू करोड खाकेगु ताः तयातयागु खँ धयादीगु खः ।

ज्याझ्वलय् न्ववानादिसें उपप्रम पोखरेलं धयादीगु दु, ‘मेगु दँय् ज्यापु दिवस हनेबलय् कोषय् छगू करोड ध्यबा दयेधुंकूगु खँ न्यने दइ, सरकारं निर्णय यायेधुंकूगु दु, आः गुलि ध्यबा वइ धयागु खँ शिक्षामन्त्री कृष्णगोपाल श्रेष्ठ व मेयर विद्यासुन्दर शाक्य मार्फत याकनं हे जानकारी बीगु जुइ ।’ अथेहे ज्याझ्वलय् न्ववानादिसें मन्त्री श्रेष्ठं सर कार परम्परा, संस्कृति संरक्षणया निंतिं प्रतिबद्ध दु धासें सरकारय् पहल यायेगु निंतिं थम्हं नं माःगु भूमिका म्हितेगु खँ धयादिल ।

येँ महानगरपालिकाया मेयर विद्यासुन्दर शाक्यं स्वनिगःया संस्कृति, परम्परा संरक्षणय् महानगरपालिका कटिबद्ध जुयाः न्ह्याः वनाच्वनागु दु धासें आः गुथि विधयेकय् नं सरोकारवाला गुथिपिंसं ठोस सुझाव बीत इनाप यानादिल । वय्कलं धयादिल, ‘सरकारं हःगु गुथि विधेयकय् झीसं विरोध प्वंकेधुंकाः सरकारं थ्व विधेयक परिमार्जन यायेत सुझाव समिति दयेकूगु दु । थ्व समितिइ जि नं दुजः दु, अले सुझावया निंतिं थीथी गुथि, सरोकार वालातलिसे सहलह यायेधुनागु दु । तर आः तक ठोस सुझाव मवःनिगुलिं समितिपाखें नं सुझाव बी फयाच्वंगु मदुनि । उकिं आः सरोकारवाला गुथियापिंसं हे ठोस सुझाव बीत इनाप याना ।’

दँय्दसं तःजिक साँस्कृतिक र्‍याली सहित ज्यापु दिवस न्यायेका वयाच्वंगुली थुगुसी कोरोना महामारीया कारणं सभागृहय् बःचाधंगु ज्याझ्वः यानाः १७ क्वःगु ज्यापु दिवस हंगु खः । ज्याझ्वलय् ११ क्वःगु ज्यापु दिवसया संयोजक मदनवीर महर्जनयात ज्यापु साँस्कृतिक धरोहर सम्मान, मनमैजु माविया प्रधानाध्यापक रबिना महर्जनयात ज्यापु सरस्वती पदक, श्री रुद्रायणी देपा दाफा खलः, ख्वनाया मू गुरु काजीलाल डंगोलयात साँस्कृतिक गुरु सम्मान व समाजसेवी, व्यवसायी रमेश महर्जनयात ज्यापु रत्न सम्मान लःल्हाःगु खः ।

सिरपाः सिफारिस समितिया संयोजक सन्तु महर्जनं थुगुसी कोरोना महामारीया कारणं मू मू सिरपाः जक बियागु व आकिवंनिसें हाकनं दँय्दसं थें थीथी सिरपाः बियायंकेगु खँ कनादीगु खः ।