माधवयात नं सरकारय् यंकीगु, थीथी सम्पर्क सूत्रपाखें माधव नेपाललिसे खँल्हाबल्हा

येँ (नेपालभाषा टाइम्स)- माओवादी केन्द्रया अध्यक्ष पुष्पकमल दाहाल थःके छगू बचं हे मन्यँसे गठबन्धन त्वःताः एमालेलिसे जानाः सरकार गठन याः वंगु खनाः माधव नेपाल व वय्कःया पार्टी नेकपा (एस) अलमलय् लाः वंगु दुसा आः सरकार गठन लिपा वय्कःयात नं थ्वहे सरकारय् ब्वना हयेगु कुतः शुरु जूगु दु ।

वय्कःयात वर्तमान सरकारय् दुहां वयेत प्रधानमन्त्री दाहालं औपचारिक रुपं हे इनाप यायेधुंकूगु दुसा थुकिया लागिं एमाले नं सकारात्मक दुगु खँ धाःगु दु । थीथी च्यानलं यानाच्वंगु कुतःया लिच्वः कथं अध्यक्ष माधव नेपाल नं दाहाल नेतृत्वया गठबन्धन सरकारय् ब्वति कायेत सकारात्मक जूगु खँ सीदुगु दु । नेपालयात सरकारय् ब्वति कायेकेगु नितिं म्हिगः प्रधानमन्त्री पुष्पकमल दाहालं नापलानाः सरकारयात समर्थन यायेत इनाप यानादीगु खः ।

प्रधानमन्त्री दाहालं थःत नापलाः वःगु इलय् नं अध्यक्ष नेपालं कांग्रेस लिसेया गठबन्धन त्वाःथलाः एमालेलिसे जानाः सरकार दयेकेगु इलय् दाहालं थःलिसे सहलह मयाः धकाः गुनासो यानादीगु खः । प्रम दाहालं नेपालया गुनासोयात सम्बोधन यायेगु निंतिं हे सरकारय् वयेत इनाप यानागु खः धकाः लिसः बियादीगु खः । दाहालं नेपालयात सरकारय् वनेगु खःसा मन्त्रिपरिषद् विस्तारया इलय् फुक्कं विषय मिले यायेफइगु खँ नं धयादीगु दु ।

मेखे नेपालयात सरकारय् हयेगु नितिं एमालेया नं छुं नेतात सक्रिय जूगु खँ सीदुगु दु । एमालेया उपाध्यक्ष लिसें उपप्रधानमन्त्री बिष्णु पौडेलं नं अध्यक्ष नेपालयात नापलानाः सहकार्य यायेत इनाप यानादीधुंकूगु दु ।

म्हिगः हे प्रधानमन्त्री दाहालं जनता समाजवादी पार्टीया अध्यक्ष उपेन्द्र यादव– यात नं नापलानादीगु दु । निम्हेसिया खँल्हा– बल्हाय् दाहालं सरकारय् वयेत इनाप यानादीगु खःसा यादवं सरकारय् वयेत थः सकारात्मक खःसां पार्टीइ सहलह यानाः जक निर्णय यायेगु लिसः बियादीगु खः ।

एमाले दुने नं माधवयात लसकुस
एमालेया विज्ञ सूत्रतय्सं धाःकथं नेकपा (एस) या अध्यक्ष माधव नेपालयात आः सरकारय् जक मखु, जिउसा नेकपा (एमाले) य् हे लित ब्वना यंकेगु लागिं नं कुतः जुयाच्वंगु दु । एमालेया निगूगु श्रेणीया नेतातय्सं वय्कःयात तःक्वःमछि नापलानाः पुलांगु खँ ल्वःमंकाः एमालेय् हे लिहां वये माल धकाः इनाप यानाच्वंगु दु । वय्कःयात पृथ्वी सुब्बा गुरुङं तःक्वः नापलानादीधुंकूगु दुसा सुवास नेम्बाङं नं नापलानाः खँल्हाबल्हा यानादीगु दु ।

वय्कःयात एमाले अध्यक्ष केपी ओलीया सन्देश ज्वनाः महासचिव शंकर पोखरेलं नं नापलायेत कुतः यानादीगु खँ सीदुगु दु । तर नेता नेपालं थःत अध्यक्ष ओलीं हे नापलाः वयेमाः धकाः अडान काःगु खँ नं सूत्रं धाःगु दु । सूत्रतय्सं धाःकथं नेता नेपालं न्हापा थःत एमाले अध्यक्ष ओलीं थःत प्रयोग याःगु दुर्वचनयात कयाः नुगलय् स्याकादीगु दु ।