फोहोर व्यवस्थापन यायेत प्रमयात पौ

यल (नेपालभाषा टाइम्स)- यल महानगरपालिकाया मेयर चिरिबाबु महर्जनं प्रधानमन्त्री पुष्पकमल दाहालयात पौ च्वयाः फोहोर व्यवस्थापनया निंतिं प्रशोधन प्लान्ट थापना यायेत ग्वाहालि फ्वनादीगु दु ।

वंगु नोभेम्बर १ निसें भारतया न्यागू शहर दिल्ली, अहमदावाद, इन्दौर, पुने व गोरखपुरया फोहोर व्यवस्थापन अध्ययन यानाः लिहां वयेधुंकाः मेयर महर्जनं प्रधानमन्त्री दाहालयात पौ च्वयाः उगु माग यानादीगु खः ।

वय्कलं प्रधानमन्त्री दाहालयात च्वःगु पतिइ फोहोर मैला प्रशोधन यानाः मत, ग्याँस व साः उत्पादन यायेगु प्रशोधन प्लान्ट थापना यायेगु आःया आवश्यकता खः धयादीगु दु । वय्कलं पतिइ च्वयादीगु दु, ‘स्थानीय तहया लगानीं जक प्लान्ट थापना याये मफइगु व उगु प्लान्टयात छगू वा निगू पालिकाया फोहोर जक मगाइगु जूगुलिं संघीय सरकारं हे स्थानीय सरकारयात साथ कयाः फोहोर मैला प्रशोधन प्लान्ट थापनाया नितिं नेतृत्व कायेमाःगु खनेदु ।’

वय्कलं साबिकया ल्याण्डफिल्ड साइटय् ल्यनाच्वंगु पुलांगु फोहोर व्यवस्थापन यानाः ओखरपौवाय् सामुदायिक पार्क वा सामुदायिक वनया रुपय् रुपान्तरण यायेमाःगु खँ नं पतिइ धयादीगु दु ।

वय्कलं पार्क वा वनया अवधारणां वातावरण संरक्षण लिसें मानव स्वास्थ्य– यात नं बांलाइगु जूगुलिं तत्काल माःगु पलाः ल्ह्वनेत नं पतिइ धयातःगु दु । अथे हे वय्कलं पुलांगु ल्याण्डफिल साइटया फोहोरया उचित व्यवस्थापन जुइगु खःसा बन्चरेडाँडाय् दुगु न्हूगु ल्याण्डफिल साइतया जनताया नकारात्मक धापू नं चीके फइगु खँ धयादीगु दु ।