आवास विधेयकया उपदफा ५ लिकात

येँ (नेपालभाषा टाइम्स)÷सरकारं संसदय् दर्ता याःगु ‘आवासको अधिकार सम्बन्धमा व्यवस्था गर्न बनेको विधेयक २०७५’ या विरोध सुरु जुइवं उकी संशोधन याःगु दु ।
सतक विस्तार संघर्ष समितिया संयोजक सुमन साय्मिं ‘नेपालभाषा टाइम्स’ लिसे खँ ल्हासें उगु विधेयकया दफा (५) या उपदफा (५) यात पूर्ण रुपं चीकूगु जानकारी बियादीगु दु ।
उगु विधेयकया दफा (५) या उपदफा (३) य् सुं नं नागरिकया छेँ वा जग्गा अधिकरण यानाः काये न्ह्यः वयात क्षतिपूर्ति व मेगु विकल्पया व्यवस्था यायेमाः धकाः च्वयातःगु दुसा उपदफा (५) य् धाःसा ‘च्वय् न्ह्यागु हे च्वयातःगु जूसां नागरिकयात वयागु आवासं चीके न्ह्यः छुं कारणवश क्षतिपूर्ति बी मफुत धाःसा लिपा बीगु आश्वासन बियाः छेँ वा जग्गा अधिकरण यानाः काःसां जिउ’ धकाः च्वयातःगु दु ।
आः थ्व विधेयकयात संंशोधन यासें अथे च्वयातःगु उपदफा ५ चीकूगु खः । थ्व उपदफा चीकूगुलिं जनताया सःया कदर जूगु दु धासें संघर्ष समितिया दुजः लिसें अधिवक्ता जितेन्द्र वज्राचार्यं थ्व थःपिनिगु विजय खःसां विधेयकय् मेगु छु छु च्वयातःगु दु अझ दुग्यंक स्वयेमानि धयादिल । उपदफा ५ चीकूसां नं उकिया दुने अज्याःगु हे जनहितय् मदुगु मेगु नं खँ दयेफइगु आशंका नं वय्कलं यानादिल ।
सतक विस्तार पीडित संघर्ष समितिं म्हिगः प्रमुख प्रतिपक्षी नेपाली कांग्रेसया सभापति शेरबहादुर देउवायात नापलानाः विधेयक बारे ध्वाथुइकूगु खः ।
अथेहे म्हिगः हे नेपाल मजदूर किसान पार्टीया सांसद प्रेम सुवालयात नं नापलानाः विधेयकयात कयाः ज्ञापन पौ लःल्हाःगु खः ।