निजी स्कुलत सतकय्

येँ (नेपालभाषा टाइम्स)- सरकारं नाफामूलक निजी विद्यालया स्थापना पनेगु कथं शिक्षा विधेयक हयेगु तयारी यायेवं उकिया विरुद्ध म्हिगः निजी विद्यालय सञ्चालकतय्गु संगठन प्याब्सन, एनप्याब्सन व हिसानं म्हिगः फिब्व ख्यलय् प्रदर्शन यात ।

शिक्षा वियेधकय् थौंकन्हय् सञ्चालन जुयाच्वंगु निजी विद्यालययात न्यादँया दुने गैरनाफामूलक शैक्षिक गुथिपाखें जक सञ्चालन यायेमाःगु प्रस्ताव यानातःगु दु । थ्व विधेयक संसदं हुबहु पारित जुल धाःसा देय्न्यंक च्याद्वः विद्यालय न्यादँया दुने शैक्षिक गुथिइ रुपान्तरण यायेमाः ।

विधेयकय् ‘शैक्षिक गुथि धायेबलय् सुं नं मनुखं लबः मकायेगु कथं विद्यालय सञ्चालन यायेगु उद्देश्यं स्थापना याःगु सार्वजनिक वा निजी गुथि धकाः थुइमाः’ धयातःगु दु । निजी विद्यालय सञ्चालकतय्सं विधेयकया उगु प्रावधान संशोधन यायेमाःगु माग याःगु खः । निजी विद्यालय संगठनं स्कुल बन्द यायेगु तकया ख्याच्वः नं बीधुंकूगु दु ।