नागरिकता मुद्दाया झगडियायात गृह मन्त्रालय

येँ (नेपालभाषा टाइम्स)÷नागरिक सम्बन्धी विवादय् लानाच्वंम्ह रवि लामिछानेयात नागरिक सम्बन्धी हे ज्या याइगु गृह मन्त्रालयया जिम्मा बिउगु खँय् तःधंगु आलोचना जूगु दु । लामिछानेया नागरिकता सम्बन्धी मुद्दा अदालतय् विचाराधीन जुयाच्वंगु दु ।

नागरिकताया मुद्दा लानाच्वंम्ह मनूयात उपप्रधानमन्त्री दयेके मजिउ धकाः शुरुइ तःधंगु दलतय्सं आपत्ति जने याःगु खःसां लिपा वनाः वय्कःयात उपप्रधानमन्त्री जक मखु गृह मन्त्रालय थेंज्याःगु शक्तिशाली कार्यभार समेत बिउगु खनाः राजनीतिक ख्यः अजूचायाच्वंगु दु ।लुमंकेबहः जू, लामिछाने छगू इलय् नेपाःया नागरिकता त्याग यानाः अमेरिकी नागरिकता कयाः अमेरिकाय् हे च्वनेधुंकूम्ह खः ।

यदि वय्कःया नागरिकता सम्बन्धी मुद्दाय् सर्वोच्चपाखें नकारात्मक फैसला वल धाःसा वय्कःया सांसद पद समेत खारेज जुइ फइगु खँ धाःगु दु । गुगु विषयय् वय्कः विरुद्ध मुद्दा लानाच्वंगु खः, वहे विषयलिसे सम्बन्धित विभागया जिम्मा बिउगु कारणं आः थः विरुद्ध लानाच्वंगु नागरिकताया मुद्दायात प्रभावित यायेगु वा थ्वलिसे सम्बन्धित प्रमाण नष्ट यायेगु ज्या वय्कःपाखें याये फइगु आशंका प्रवल जुया वःगु दु । लामिछाने थम्हं नं थःगु मुद्दा प्रभावित यायेगु लागिं हे गृह मन्त्रालय दावी याःगु आशंका याना हःगु दु ।

न्हापा न्हापा गृह मन्त्रालय कायेगु लागिं दलतय् दथुइ तःधंक ल्वापु जुइगु खः । थुगुसी धाःसा चीधंगु दलया न्हूम्ह मनूयात गृह मन्त्रालय बीगु लागिं माओवादी व एमाले थेंज्याःगु तःधंगु पार्टीत तुरुन्त हे सहमत जूगुलिं थुकिया लिउने मेगु तत्वं भूमिका म्हितूगु जकं मखुला धकाः नं शंका याना हःगु दु ।

गणितीय समीकरण स्वत धाःसां नं पुष्पकमल दाहालया वर्तमान सरकारय् रवि लामिछानेया समर्थन मदुसां नं छुं मपाः । सरकारयात १७० सांसदया समर्थन दु । यदि लामिछानेया २० सिट घटे जूसां सरकारया पक्षय् १५० सांसद दइ ।

सम्बन्धित बुखँ

LEAVE YOUR COMMENTS