थिमिइ नेपालभाषा विषय ब्वंकेत ध्यानाकर्षण पौ लःल्हात

थिमि – थिमिया भाषाप्रेमीपिंसं मध्यपुर थिमि नगरया स्कुलय् नं स्थानीय मांभाय् कथं नेपालभाषा विषय अनिवार्य ब्वंकेत माग याःगु दु । थुकिया निंतिं भाषाप्रेमीपिंसं मध्यपुर थिमि नगरपालिकाया मेयर मदन सुन्दर श्रेष्ठयात नापलासें छगू ध्यानाकर्षण पौ लःल्हाःगु खः ।

नेपालभाषा संरक्षण अभियानया संयोजक कृष्णकाजी मानन्धर, दुजःपिं नविन प्रकाश श्रेष्ठ, ईश्वरलाल श्रेष्ठ, सुरेन्द्र किलंनः श्रेष्ठ, ओम कृष्ण श्रेष्ठ, जीवन पति श्रेष्ठपिंसं मेयर श्रेष्ठयात नापलासें थ्व ध्यानाकर्षण पौ लःल्हाःगु खः ।

पौ लःल्हाना कासें मेयर श्रेष्ठं वइगु असार ७ निसें सुरु जुइगु नगरपरिषद्या बैठकं प्रस्ताव कथं यंकेगु प्रतिबद्धता प्वंकादीगु खः । अथेहे वय्कलं नेपालभाषा ब्वंकेगु निंतिं नीति तथा कार्यक्रमय् न्ह्यथनाः बजेटया व्यवस्था यायेगु खँ नं धयादीगु दु ।

थ्व झ्वलय् वय्कलं पाठ्यक्रम घोषणा जक यानाः मगाः धासें आवश्यक कथं तयारी यानाः न्ह्याः वनेगु प्रतिबद्धता प्वंकादीगु खः ।