सार्वजनिक संस्थान लेखापरीक्षणं तापाक

येँ – देय्या दर्जनौं सार्वजनिक संस्थान व सरकारी निकायं दँ दँ न्ह्यवंनिसें लेखापरीक्षण याकामच्वंगु सीदुगु दु । अज्याःगु संस्था वा निकाय लेखापरीक्षण मयासे संचालन जुयाच्वंगु जक मखसे इमिसं बेरुजु फछ्र्यौट यायेगु खँय् नं चिउताः क्यनाच्वंगु मदु ।

गुथि संस्थान, नेपाल खानेपानी संस्थान, राष्ट्रिय खेलकुद परिषद्, नेपाल पर्यटन बोर्ड, साझा प्रकाशन, राष्ट्रिय बीमा संस्थान, नेपाल खाद्य संस्थान, नागरिक लगानी कोष, पशुपति क्षेत्र विकास कोष लगायत दर्जनौं संस्थां लेखापरीक्षण मयाकूगु दँ दँ दयेधुंकूगु दु ।

वंगु छुं दिं न्ह्यः प्रतिनिधिसभा सार्वजनिक लेखा समितिया बैठकय् महालेखा परीक्षक टंकमणि शर्मां थीथी सार्वजनिक संघसंस्था व निकायय् दँदँ न्ह्यःनिसें हे लेखापरीक्षण याकेत धया वयाच्वनागु खःसां उकियात वास्ता यानामच्वंगु जानकारी बियादीगु खः ।

नेपाःया संविधानकथं संघ, प्रदेश व स्थानीय यानाः स्वंगू तहया दक्वं सरकारी ज्याकू, संघसंस्था, निकायनापं नेपाल सरकारया पूर्ण स्वामित्व दुगु संगठित संस्थाया कार्यदक्षता, कार्यक्षमता, प्रभावकारीता, औचित्यता, नियमितता, मितब्ययितायात कयाः महालेखा परीक्षकपाखें लेखापरीक्षण यायेमाःगु व्यवस्था दु ।