२५ म्ह सा सुनां स्यात ?

येँ- पश्चिम नेपाःया वीरेन्द्र नगरय् छथासं २५ म्ह सा सिनाच्वंगु घटनायात कयाः तःधंगु शंका उपशंका ब्वलनाच्वंगु दु । सा सीगु घटनायात कयाः छम्हं मेम्हेसित द्वपं बियाच्वंगु दुसा थ्वहे इलय् पुलांम्ह प्रधानमन्त्री डा. बाबुराम भट्टराईं कट्टर हिन्दूवादी पार्टी राप्रपां हे थ्व ज्या याःगु धकाः द्वपं बियादीगु दु ।
डा. भट्टराईं सा व पुलांम्ह जुजुयात कुबिया वनाच्वंगु राप्रपां सा स्यानाः पाखण्ड क्यनाच्वंगु द्वपं बियादीगु खः । समाजवादी पार्टीया घ नम्बर प्रदेश समायोजन कार्यदलं म्हिगः यलय् ग्वसाः ग्वःगु ज्याझ्वलय् न्ववायेगु झ्वलय् वय्कलं उगु द्वपं बियादीगु खः।
‘राजतन्त्रया भूतया रुपय् वःगु पार्टी राप्रपां जुजु व सायात कुबिया वनाच्वंगु दु । अथे जुयाः छिकपिंसं सिल जुइमाः थःगु हे नगरपालिकाय् सायात मुंकाः ट्रकय् तयाः भिरं कुर्काः सा स्यानाच्वंगु दु, थ्व थेंज्याःगु पाखण्ड मेगु छु जुइ ?’ वय्कलं धयादिल ।
नेपालगञ्जं २९१ म्ह सा ज्वनाः दैलेखपाखे वनाच्वंगु गाडी वीरेन्द्रनगरया कटकुवा जंगलय् दुर्घटना जुयाः सा फुक्कं भीरं कुतुं वंगु खः । उकी लानाः २५ म्ह सा सीगु खः । थ्व दैलेखया धार्मिक क्षेत्र श्रीस्थान धाःथाय् तयेत यंकूगु खँ धाःगु दु ।
अन थ्व सा सीगु घटनायात हिन्दू धर्मावलम्बीतय्सं धाःसा शंकास्पद रुपं काःगु दु । थ्व सा धाथें दुर्घटना जुयाः सीगु खः लाकि भीरं कुर्काः स्याःगु खः धइगु खँय् न्ह्यसः ब्वलनाच्वंगु दु । प्रहरीं सा तयाः यंकूगु ट्रकया चालकतय्त ज्वनाः छानबिन यानाच्वंगु दु ।
थ्व घटनायात कयाः सरकारं छानबिन याइगु जूगु दुसा राप्रपा नं छानबिन यायेगु धाःगु दु ।