पःमांयात भक्तपुर प्रतिभा सिरपाः

ख्वप(नेपालभाषा टाइम्स)- वरिष्ठ साहित्यकारलिसें पशुपतमान पःमांयात शब्द यात्रा भरत जंगम भक्तपुर प्रतिभा सिरपाः–२०७९ लःल्हाइगु जूगु दु । शब्द यात्रा प्रकाशन समितिं शिक्षा सेवीलिसें च्वमि पःमांयात उगु सिरपाः लःल्हायेगु क्वःछिउगु खः ।

प्रकाशनपाखें नीस्वंगु पुरस्कृत व्यक्तित्व ल्यज्या समितिया मुाज्यां वय्कःयात सिरपाः बीगु क्वःछिउगु खः । अध्यात्मिक च्वमि ढुण्डीराज पोखरेलया संयोजकत्वय् कवि पदम दाहाल व आख्यानकार प्रजापति तिमिल्सिना दुथ्याःगु ल्यज्या समितिं पःमांया नां छनोट याःगु खः। थ्व स्वयां न्ह्यः उगु सिरपाःया निंतिं योग्यम्ह व्यक्तिया नां सिफारिस यायेत सार्वजनिक रुपं आह्वान तकं याःगु खः । सिफारिस कथं प्राप्त नांमध्ये साहित्यकार पःमांयात थुगुसी उगु सिरपाः बीगु समितिं क्वःछिउगु खः ।

थ्या सफुतिइ च्वंंगु मौलिक स्वस्थानीया बाखंयात न्हापांखुसी नेपालभाषां भाय् हिलाः पिथनादीगु योगदानयात कयाः वय्कःयात उगु सिरपाः बीगु निर्णय याःगु खः । ख्वपया प्रतिभावान च्वमि व साहित्यकारयात दँय्दसं लःल्हायेकथं भारत जंगमं प्रकाशनया नामं उगु सिरपाःया निंतिं अक्षय कोष स्वनादीगु खः ।
थ्व हे मंसिर महिनाय् लःल्हाइगु थ्व सिरपाः थगुने कोमलवदन मल्लयात लःल्हाःगु खः ।