रामग्राम सम्झौता खारेज यायेत उजं
येँ (नेपालभाषा टाइम्स)÷रामग्राम क्षेत्रय् उत्खनन् व विकास यायेत लुम्बिनी विकास कोषं याःगु सम्झौता खारेज यायेत संसदया सार्वजनिक लेखा समितिं निर्देशन बिउगु दु । म्हिगः च्वंगु समितिया बैठकं उगु निर्देशन बिउगु खः । समितिया सभापति ऋषिकेश पोखरेलं लुम्बिनी विकास कोषं रामग्राम क्षेत्रय् याःगु सम्झौता लिसे फुक्कं ज्या म्हिगःया मितिंनिसें हे लागू जुइकथं खारेज यायेत सरकारयात निर्देशन बीगु निर्णय जूगु खँ कनादीगु दु ।
समितिं थुगु प्रकरणय् दुथ्याःपिंत अनुसन्धान यायेत नं निर्देशन बिउगु दु । थज्याःगु हे ज्या मेगु थासय् मजुइमा धकाः सरकारयात थज्याःगु निर्देशन बियागु खँ नं पोखरेलं कनादीगु दु ।
थ्व स्वयां न्ह्यः कोष व द प्रमिस्ड धइगु निजी कम्पनी दथुइ रामग्राम क्षेत्र सौन्दर्यकरण व बौद्ध स्तुपा दयेकेगु समझदारी जूगु खँ सार्वजनिक जूगु खः । समितिं युनेस्कोया मापदण्ड व कानुनी प्रक्रिया कथं दयेकेगु ज्या यायेत व मापदण्ड अःखः जूगु उत्खनन्या अनुसन्धान यायेत नं समितिं निर्देशन बिउगु खः ।
LEAVE YOUR COMMENTS