मरुसतः दयेकेत सिँ लुल

येँ – येँदेय्या ऐतिहासिक सम्पदा मरुसतः दयेकेगु लागिं आवश्यक जुइगु सिँ उपलब्ध जुइगु जूगु दु । मरुसतःयात माःगु सिँ महोत्तरीया बर्दिबासपाखें हयेगु तयारी जूगु खँ सीदुगु दु ।

अन सिँ स्वयेगु लागिं नकतिनि हे काष्ठमण्डप पुनर्निर्माण समितिया अध्यक्ष राजेश शाक्य लगायतया छगू पुचः अन वनाः निरीक्षण याना वःगु खः ।

मरुसतः दयेकेत माःगु सिँ उपलब्ध याकेगु धकाः वन विभागपाखें आवश्यक स्वीकृति नं वयेधुंकूगु खँ सीदुगु दु । नेपाल विद्युत प्राधिकरणं भारतपाखें ४०० केभीया मत हयेगु लागिं अन हाइटेन्सन तार तयेगु न्ह्याकेत्यंगु दु । अन तार तयेगु लागिं आपालं सिमा पाले माःगु आवश्यकता दु । वहे पाःगु सिमा आः मरुसतः दयेकेगु लागिं उपलब्ध याकीगु खँ धाःगु दु । विद्युत प्राधिकरणं आः भारतया मजफ्फपुरया लँपु जुयाः नेपालय् मत हयेत्यंगु खः ।

मत हयेगु लागिं आ द्वलंद्वःमा हे सिमा पाले मालीगु खःसां उकी मध्ये ततःमागु व ज्या लगे जूगु सिमा जक मरुसतः दयेकेगु लागिं हयेगु खँ पुनर्निर्माण समितिया अध्यक्ष लिसें ३ नं. प्रदेशया सांसद राजेश शाक्यं कनादिल । मरुसतःया लागिं ३८ फिट, २० फिट तजाःगु सिमा आवश्यक जू । अज्याःगु सिमा फुक्क मरुसतःयात बीगु स्वीकृति वन विभागं बीधुंकूगु दु ।

सिमा स्वयेगु लागिं अध्यक्ष शाक्यया अध्यक्षताय् ओभरसियर समेत दुगु टोलीं अन निरीक्षण याः वंगु खः । अन सिमा पालेगु ज्या सुरु जुइवं मरुसतःया लागिं हयेगु खँ धाःगु दु । तःभुखाचं ध्वस्त जूगु मरुसतःया पुलांगु सिँ थौंकन्हय् हनुमानध्वाखाया पुलांगु प्रहरी ज्याकुथी सुरक्षित याना तःगु दु । आः मरुसतः दयेकीबलय् पुलांगु सिँ नं जिक्व फुक्क प्रयोग यायेगु व मगाःथाय् न्हूगु सिँ छ्यलेगु खँ धाःगु दु ।