स्वतन्त्र पार्टी स्वंगूगु शक्ति जुइगुपाखे

येँ (नेपालभाषा टाइम्स)- मंसिर ४ गते क्वचाःगु प्रतिनिधि सभा व प्रदेश सभा चुनावया प्रारम्भिक लिच्वः सकसितं अजूचायापुक पिहां वयाच्वंगु दु । थ्व चुनावं पुलांगु राजनीतिक पार्टीतय् प्रति जनतायाके दुगु वितृष्णा बांलाक हे उजागर जूगु दुसा न्हूगु राजनीतिक शक्तिया उदय जुइगु स्पष्ट संकेत बिउगु दु ।

आः तक जूगु मतगणनाया लिच्वः कथं गं चिं कयाः दंपिं राष्ट्रिय स्वतन्त्र पार्टीया उम्मेदवारत फुक्क हे थासय् न्ह्यःने लानाच्वंगु दु । प्रत्यक्ष चुनावय् थ्वं हःगु मतसंख्या स्वयेबलय् समानुपातिकपाखे थ्वं यक्व हे मत हयाः स्वंगूगु तःधंगु शक्ति जुइगु सम्भावना ब्वलंगु दु । यदि थ्व पार्टी संसदया स्वंगूगु तःधंगु शक्ति जुल धाःसा सत्तासमीकरणय् थ्व निर्णायक भूमिका म्हिते खनीगु सम्भावना नं खनेदु ।

सत्ता गठबन्धनपाखे नेपाली कांग्रेसं ३७ गू क्षेत्रय् अग्रता कयाः दकलय् न्ह्यःने लाःगु दुसां गठबन्धनय् दुथ्याःगु मेमेगु दलतय्त धाःसा आः अस्तित्व बचे यायेत तकं थाकुइगु अवस्था ब्वलंगु खनेदु । गठबन्धनय् दुथ्याःगु दलत माओवादी केन्द्र, एकीकृत समाजवादी, राष्ट्रिय जनमोर्चायात थाकुगु अवस्था वइगु खनेदुसा गठबन्धन त्वःताः पिहां वंगु जसपायात नं आः अस्तित्वया हे संकट जुइगु खनेदु । जसपाया वरिष्ठ नेतात उपेन्द्र यादव, राजेन्द्र श्रेष्ठ थेंज्याःपिं नेतात हे विजयपाखें तापाक लाःवंगु दु ।

तराई लागाय् नं लोसपा व जसपाया बर्चश्वय् संकट वःगु दु । बरु अन सीके राउतया जनमत पार्टी व रेशम चौधरीया जनता उन्मक्ति पार्टीया लोकप्रियता बल्लाना वयाच्वंगु खनेदु । कैलाली १ य् जनता उन्मुक्ति पार्टीया अध्यक्ष रंजिता श्रेष्ठ चौधरी मतगणनाय् दकलय् न्ह्यःने लानाच्वंगु दु ।

गणनाय् नेपाली कांग्रेस दकलय् न्ह्यःने लाःसां यदि सत्ता गठबन्धनया मेमेगु दलया उम्मेदवारत पराजित जुल धाःसा कांग्रेसयात सरकार गठनय् समस्या पिहां वये फइगु खनेदु । छाय्धाःसां कांग्रेसं १०० सिबें नं कम सिटय् उम्मेदवार थंगु दु । एमालें यक्व उम्मेदवार थंगु जुयाः थ्वं त्याकीगु सिट संख्या अप्वः दये फइगु अनुमान याःगु दु ।

आः पिहां वयाच्वंगु लिच्वः–पाखें मतदातातय्सं न्हूगु परिवर्तन चाहे जुयाच्वंगु खनेदु । खास यानाः रवि लामिछानेया न्हूगु पार्टीपाखें दनाच्वंपिं यक्व उम्मेदवारतय्गु नां तक नं गनं न्यने मदु तर नं उमिगु चुनाव चिन्हय् धाःसा यक्व हे छाप लानाच्वंगु दु । थ्व पार्टीया कारणं देय्या शंकर पोखरेल, बिष्णु पौडेल थेंज्याःपिं नेतात हे पराजित जुइ फइगु अनुमान याना हःगु दु । थ्वहे पार्टीया लामिछाने नं बरु सेफ जोनय् मलाःनि ।

सम्बन्धित बुखँ

LEAVE YOUR COMMENTS