भाषासेवी उद्योगपति लक्ष्मीदास मानन्धर मंत

येँ – नांजाःम्ह उद्योगपति लिसें भाषासेवी लक्ष्मीदास मानन्धर थौं विहीवाः बहनी मंत । वय्कः ९४ दँ दुम्ह खः ।

छुं न्हि न्ह्यवंनिसें कोरोना पोजिटिभ खने दयाः छेँय् हे च्वंच्वनादीम्ह वय्कःयात विहीवाः हे तिनि उसाँय् स्यना वंगुलिं ह्याम्स अस्पतालय् भर्ना याःगु खः । ह्याम्सय् हे वासः याकुयाकुं वय्कः मदुगु खँ चिकित्सकतय्सं धाःगु दु ।

छेँजःपिंसं बिउगु जानकारी कथं शुक्रवाः हे वय्कःया अन्तिम संस्कार यायेगु ज्याझ्वः दयेकूगु दु । मदुम्ह मानन्धरया काय निम्ह व म्ह्याय् निम्ह दी ।

वय्कःया तःधीम्ह काय लिसें भाषाह्यमि देवदास मानन्धर नं छु ई न्ह्यः तिनि ब्रेन ह्यामरेज जुयाः बाँसबारीया न्यूरो अस्पतालय् भर्ना यानातःगु खः ।

भाजु लक्ष्मीदास मानन्धर नेपालय् खाद्यान्न ख्यःया नांजाःम्ह व्यवसायी खः । वय्कः थौंकन्हय् साल्ट ट्रेडिङ लिमिटेडया अध्यक्ष खःसा एमाले समर्थित उद्योग वाणिज्य संघया नं अध्यक्ष जुयादी । अथे हे नेपाल संवत् न्हूदँ समारोह समितिया सल्लाहकार नं खः ।

नेपालभाषाया माध्यमं आखः ब्वंकेज्यायात तिबः बीगु लागिं वय्कलं थः मां व बौया नामं ‘लक्ष्मीनारायण–पुण्यमाया सिरपाः’ नं स्वनादीगु खः । थुगु दँया थ्व सिरपाः इनेज्या याकनं यायेगु लागिं वय्कलं तयारी याना च्वनादीगु खः ।

शिक्षा व समाजसेवाया ख्यलय् नं उतिकं सक्रिय जुयादीम्ह भाजु मानन्धरं केन्द्रीय मानन्धर संघ, थँहिति मानन्धर गुथिइ नं आपालं योगदान यानादीगु दु ।

सम्बन्धित बुखँ

LEAVE YOUR COMMENTS