स्वन्हु दुने प्रत्यक्षया लिच्वः वइ
येँ (नेपालभाषा टाइम्स)- कंस जुइगु प्रतिनिधिसभा व प्रदेशसभाया प्रत्यक्ष निर्वाचनपाखेया लिच्वः स्वन्हुया दुने सार्वजनिक याइगु जूगु दु । प्रमुख निर्वाचन आयुक्त निदेशकुमार थपलियां थुकिया जानकारी बियादीगु दु । वय्कःया कथं मंसिर ७ गते बहनी तकया दुने प्रत्यक्षपाखेया फुक्कं लिच्वः सार्वजनिक यायेगु तयारी जुयाच्वंगु दु ।
म्हिगः ‘स्थिर समय’ शुरु जुइ न्ह्यः याःगु पत्रकार सम्मेलनय् आयुक्त थपलियां धयादिल, ‘फुक्कं मतपेटिका संकलन जुइवं मतगणना न्ह्याइ, स्वन्हुया दुने प्रत्यक्षपाखे व वयां न्यान्हु लिपा समानुपातिकया फुक्कं मत गणना क्वचायेकेगु योजना दु ।’
न्हापा न्हापाया चुनावय् लिच्वः पिहां वयेत हे यक्व ई काइगु जूगुलिं उकिं यानाः सरकार गठनया ज्याय् समेत लिच्वः लाः वनीगु जुयाच्वंगु दु । थुगुसी हरेक निर्वाचन क्षेत्रय् अन हे निर्वाचन अधिकृत तोके यानातःगु जूगुलिं मतगणना नं अन हे च्वनाः याइगु खँ धाःगु दु । यक्व थासय् मतगणना जुइगु जूगुलिं गणनाया लिच्वः नं याकनं पिहां वइगु खँ वय्कलं कनादीगु दु ।
मतदान केन्द्रय् स्वंगू सुरक्षा घेराया व्यवस्था यानागु खँ धासें वय्कलं मतदान केन्द्रय् छुं अप्रिय घटना जुल धाःसा ३० मिनेटया दुने नेपाली सेना थ्यनीकथं व्यवस्था यानागु जानकारी नं बियादिल । सुरक्षा व्यवस्था कडा जूगुलिं बुथ कब्जा यानाः चुनाव त्याकेगु सोच सुनानं मतःसां जिउ धकाः नं वय्कलं स्पष्ट यानादिल ।
आयोगं थौं बहनी तकया दुने मतदान केन्द्र दयेकेगु ज्या पूवंकेत्यंगु दु । निर्वाचन आयोगं सुरक्षा संवेदनशीलता स्वयाः छुं मतदानस्थलय् हेलिकप्टरं नं अनुगमन यायेत्यंगु दु । आयोगं अज्याःगु सम्भावित क्षेत्रय् सुरक्षा व्यवस्था कडा यायेत निर्देशन बिउगु दु ।
थ्व स्वयां न्ह्यःया चुनावय् बुथ क्याप्चर याःगु मतदानस्थल व संवेदनशील मतदान स्थलया विश्लेषण यायेगु झ्वलय् विशेष धलखय् तयाः हेलिकप्टरं अनुगमन यायेगु खँ
धयादीगु खः । उकथं हे नेपाःया सीमा क्षेत्र ७२ घण्टांनिसें बन्द यायेगु व थुकिया नितिं सम्बन्धित पक्षलिसे सहलह यानाः कार्यान्वयन यायेत्यनागु खँ धयादीगु दु ।
उकथं हे निर्वाचन आयोगं निर्वाचनया फुक्कं लिच्वः मंसिर २२ गते न्ह्यः हे वयेफइगु दावी नं यानादीगु दु । वय्कलं मंसिर २२ गते फुक्कं लिच्वः राष्ट्रपति भण्डारीयात लःल्हायेगु तयारी जुयाच्वंगु जानकारी बियादीगु खः ।
LEAVE YOUR COMMENTS