लकडाउन मोडालिटीया कार्ययोजना हयेत उच्चस्तरीय समितियात निर्देशन

येँ – सरकारं लकडाउनया मोडालिटीया बारे कार्ययोजना न्ह्यब्वयेत कोभिड-१९ संक्रमण रोकथाम तथा नियन्त्रण उच्चस्तरीय समन्वय समितियात निर्देशन बिउगु दु ।

प्रधानमन्त्री निवास बालुवाटारय् बिहीवाः च्वंगु मन्त्रिपरिषदया मुँज्यां लकडाउनया स्वरुप हिलेगु बारे सहलह जूगु खः । मुँज्याय् लकडाउन ७३न्हु ताःहाक जुइधुंकूगुलिं जनतायात थाकू धासें उकीया स्वरुप हिलेगु बारे न्हूगु योजना हयेमाःगु बारे सहलह जूगु खः । उगु सहलह कथं आः लकडाउनयात छ्वसुकेगु निंतिं योजना न्ह्यब्वयेत उच्चस्तरी समितियात निर्देशन बिउगु खः ।

अथेहे कोभिड-१९या संक्रमण अप्वया वनाच्वंगुलिं उकीयात नियन्त्रण यायेगु बारे नं मुँज्याय् सहलह जूगु खः । नापं विदेशं नेपाः लिहांवयेत स्वयाच्वंपिं नेपाःमितय्त लितहयेगु निंतिं यायेमाःगु व्यवस्थाया बारे नं मन्त्रिपरिषदय् सहलह जूगु खः ।