लानिपुखू सुथय् चाःहिले जीक चायेकीगु

येँ (नेपालभाषा टाइम्स)- थनया ऐतिहासिक लानिपुखू आः सुथय् सुथय् चाःहिलेछिंक चायेकीगु जूगु दु । म्हिगः येँ मनपाया प्रमुख प्रशासकीय अधिकृत प्रदीप परियारं लानिपुखू लागाया निरीक्षण यानाःलि थ्व निर्णय यानादीगु खः । येँय् सुथय् चाःहिलेगु लागिं खुल्ला थाय् मदयाच्वंगु इलय् लानिपुखू चायेकीबलय् स्थानीयवासीयात सहज जुइगु खँ धाःगु दु ।

आःयात लानिपुखूया देगः, पःखाः आदि दयेकेमाःथाय् दयेकाः थ्वयात सुथय् चाःहिलेछिंक खुल्ला यायेगु ग्वसाः मनपां याःगु दु । लिसें बहनी स्वयेबलय् यइपुइकथं अन रात्रिकालीन मत च्याकाः सुन्दर यायेगु नं तयारी मनपां याःगु दु । ०७२ सालया भुखाचय् लानाः क्षति जूगु लानिपुखूयात लिपा दथुइ शिखर शैलीया देगः तयाः पुननिर्माण याःगु खः ।

म्हिगः लानिपुखू निरीक्षण लिपा प्रमुख प्रशासकीय अधिकृत परियारं वडा नं. २७ य् वनाः अनया वडा अध्यक्ष योगेश खड्गीयात लानिपुखू चायेकेगु बारे सहलह यानादीगु खः । वडा अध्यक्ष खड्गीं उगु इलय् वडा भवन नं मछिंगुलिं बांलाःगु थासय् तयेमाःगु खँ कनादीगु खः ।