ने. सं. ११४६ अनलाथ्व पुन्हि -

नेवाः व तामाङ भाय्यात प्रभावकारी रुपं कार्यान्वयन याये

चुनावी अभियान गुकथं न्ह्यानाच्वंगु दु ?
— चुनावया मिति सतिना वयाच्वंगु इलय् प्रचार प्रसार नं तीव्र रुपं न्ह्यानाच्वंगु दु । न्हिथं घरदैलो, मतदातानाप अन्र्तक्रिया, थीथी खलः पुचःनाप क्वथा मुँज्यालिसें भेला, भेटघाट जुयाच्वंगु दु ।

चुनावया निंतिं छिगु एजेन्डात छु खः ?
— संघीयतायात क्वातुकाः बागमति प्रदेशया विकास, थनया जनतायात समृद्ध यायेगु कुतः जुइ । प्रदेशया मूर्त अमूर्त सांस्कृतिक सम्पदा संरक्षण, विष्णुमति सरसफाई, त्वनेगु लःया व्यवस्थापन, शहरी सुरक्षाया निंतिं सीसी क्यामराया व्यवस्थापन, सार्वजनिक मत व सहर सचुकुचुया निंतिं स्थानीय सरकारनाप सहकार्य व समन्वय यायेगु, समुदायय् आधारित स्वास्थ्य क्लिनिकयात प्रभावकारी याना यंके, स्थानीय विकास व पूर्वाधार विकासयात जोड बीगु जुइ । अथे हे नेपालभाषा व तामागं भाय्यात बागमति प्रदेश सरकारं प्रशासनिक भाय्या मान्यता बिउगु लिधंसाय उकियात प्रभावकारी कार्यान्वयन यानायंकेगु जुइ ।

जनताया प्रतिक्रिया छु दु ?
— जनताया प्रतिक्रिया अतिकं बांलाःगु खना । ५ दँ न्ह्यः न्ह्यब्वयागु प्रतिबद्धताकथं जनआधारित जुयाः गुलिनं ज्या यानागु दु, उकिया बांलाक मूल्यांकन जूगु खना । निष्पक्ष र इमान्दारितापूर्वक ज्या यायेगु कुतः याना, उकिया लिच्वः आःया निर्वाचनय् खने दइ धइगु भलसा कयाच्वना । धाथें जनप्रतिनिधि गथे जुइमाः धइगु नमूना बीगु कुतः न्हापांगु कार्यकालय् याना ।

त्याना वन धाःसा छु छु यानादी ? बुँदागत रुपं धयादिसँ ।
— स्थानीय सरकारनापं समन्वय व सहकार्य याना न्ह्याः वने । संविधानय् जुयाच्वंगु व्यवस्थाकथं प्रादेशिक अधिकारयात स्थापित याये । स्थानीय संघसंस्था, गुथि, खलः, पुचःनापं संस्थागत सहकार्य याये । नेपालभाषाया विकासया निंतिं नीतिगत व्यवस्थाया पहल याये । जिगु निर्वाचन क्षेत्रया मतदाता व जनतानाप निरन्तर अन्र्तक्रिया, संवाद यानाः जवाफदेही र जिम्मेवार जनप्रतिनिधिया भूमिका म्हिते ।

जनतां छितः हे ल्ययेमाःगु कारण छु ?
— येंँ क्षेत्र नं. ७ (१) नापनापं समग्र बागमति प्रशेया विकासया निंतिं, राजनीतियात व्यापार व निजी स्वार्थं पिने च्वनाः भावी पुस्तायात राजनीतिप्रति आकर्षित यायेगु नितिं प्रदेश सभा जरुरी दु धइगु तायेका च्वना । उकथंया हे वातावरण तयार वनेगु कुतःलिसें प्रतिवद्धता प्वंकाच्वना । थ्व हे कारणं जनतां जितः हाकनं ल्यइ धइगु विश्वास दु ।

त्याइगु सम्भावना वा आधार छु खः ?
— न्हापांगु कार्यकालय् प्रदेशसभा दुने च्वनाः आवश्यक कानून निर्माणया निंतिं म्हितागु भूमिका, प्रतिबद्धता अनुरुप जूगु ज्या, थ्व बाहेकं जुयाच्वंगु विकास निर्माण, सम्पदा, संस्कृतिया क्षेत्र जूगु ऐतिहासिक ज्याया आधारय् येँ क्षेत्र नं. ७ (१) या जनताया मन त्याकेत सफल जूगु खनेदु । लोकतान्त्रिक बाम गठबन्धनपाखें जिगु उम्मेदवारी जूगुलिं गठबन्धन दुनेया पार्टीतय्गु संगठनात्मक आधार व जनताया जिप्रतिया आकर्षण हे त्याइगु मुख्य आधार खः ।