
येँ (नेपालभाषा टाइम्स) – स्वनिगलय् कोरोना भाइरस संक्रमिततय् ल्याः अप्वया वनाच्वंगु इलय् सरकारी अधिकारीतय्सं धाःसा स्वनिगलय् समुदायस्तरं कोरोना संक्रमण मजूनिगु दावी याःगु दु ।
संक्रमिततय् ल्याः अप्वया वनेगु लिसें स्वनिगःया धलय् हे कोरोना भाइरस खनेदयेवं थन समुदायस्तरं हे संक्रमण सुरु जुइधुंकूगु धकाः चिन्ता ब्वलनेगु जुयाच्वंगु दु। तर इपिडिमियोलोजी तथा रोग नियन्त्रण महाशाखाया निर्देशक डा. वासुदेव पाण्डें स्वनिगलय् समुदायस्तरय् भाइरस न्यनेधुंकल धयागु अवस्था मवःनि धयादीगु खः ।
बिबिसीलिसे खँ ल्हासें वय्कलं धयादीगु दु, ‘स्वनिगलय् समुदायस्तरय् भाइरस न्यनेधुंकल धायेगु यानाच्वंगु दु, थज्याःगु अवस्था थ्यं मवःनि । तर मवइ धकाः नं धायेफइमखु। थज्याःगु अवस्था नं वयेफु, उकिं आः हे सतर्क जुया च्वनेमाः ।’
वय्कलं धयादीगु दु, ‘स्वनिगलय् जिमिसं ट्राभल हिस्ट्री मदुपिंके नं संक्रमण जूगु ला लुइकागु दु, तर समुदायय् वनाः परीक्षण यानाबलय् उमि सम्पर्कय् वःपिंके धाःसा संक्रमण लूगु मदुनि । उकिं आः स्थानीयस्तरय् संक्रमण जूगु जक खनेदु, सामुदायिक स्तरय् मथ्यंनि । तर छन्हु कि छन्हु समुदायस्तरय् नं वनी हे तिनि, उकिं झीसं सतर्कता नाले हे माः ।’ वय्कलं आः समुदायय् संक्रमण जुइफइगु स्थितिया अध्ययन जुयाच्वंगु खँ धयादीगु दु ।
वय्कलं स्वनिगलय् विशेष यानाः स्वंगू वर्गया संक्रमितत खनेदुगु खँ नं धयादीगु दु। थुपिं स्वंगुलिं वर्गयात हे लक्षित यानाः संक्रमितत पहिचान यायेगु व परीक्षण अप्वयेकेगु ज्या जुयाच्वंगु दावी वय्कःया दु। वय्कःया कथं आः स्वनिगलय् विदेशं उद्धार याना हःपिं, संक्रमण यक्व न्यनेधुंकूगु जिल्लां वःपिं व स्थानीय स्तरया यानाः स्वंगू वर्गया संक्रमितत दु ।
स्वनिगलय् संक्रमित खनेदुपिं मध्ये तसकं म्हो संक्रमितत जक पिने यात्रा मयाःपिं जूगु व पिनें वःपिंलिसे स्वापू मतःगु खनेदुगु खँ नं वय्कलं जानकारी बियादीगु दु। वय्कलं धयादीगु दु, ‘आःतक संक्रमण खनेदुपिं मध्ये ९७ प्रतिशत आयातीतपिं दु, उकिसनं ९० प्रतिशत मिजंत दु। समुदायय् न्यंगु खःसा उलि हे ल्याखय् मिस्तय्त नं संक्रमण खनेदयेमाःगु खः, आःतक अथे खनेमदुनि ।’ सोमवाः तक स्वनिगलय् मुक्कं २३९ म्हेसिके संक्रमण खनेदयेधुंकूगु दु। उकी मध्ये दकलय् अप्वः येँय् १६१ म्हेसिके, यल व ख्वपय् ३९÷३९ म्हेसिके संक्रमण लूगु खः ।
स्वास्थ्य मन्त्रालयया प्रवक्ता डा. समिरकुमार अधिकारीं नं स्वनिगलय् समुदायस्तरय् कोरोना मन्यंनीगु खँ धयादीगु दु। वय्कलं स्वनिगलय् संक्रमण खनेदुगु क्षेत्रयात ध्यानय् तयाः उगु क्षेत्रय् च्वनिपिनि र्यान्डम स्याम्लिब यानाः परीक्षण न्ह्याका च्वनागु खँ नं धयादीगु दु।
शुक्रराज ट्रपिकल तथा सरुवा रोग अस्पतालया क्लिनिकल अनुसन्धान शाखाया संयोजक डा. शेरबहादुर पुनं धाःसा स्वनिगलय् समुदायस्तरं न्यनेधुंकूगु संकेतत वयाच्वंसां उकियात पुष्टि यायेत धाःसा हाथ्या दनिगु खँ धयादीगु दु। वय्कलं धयादीगु दु, ‘स्रोत हे सीमदुपिंके नं संक्रमण खनेदुगु अवस्थाय् समुदायस्तरय् थ्यन धयागु संकेत क्यंगु दु, तर नेपालय् लक्षण हे खनेमदइगु कथंया कोरोना भाइरस वःगुलिं यकिन यानाः धायेत समस्या जुयाच्वंगु दु। थ्व तःधंगु हे हाथ्या जुयाच्वंगु दु।’
नेपालय् सामान्य लक्षणय् खनेदुपिं मनूत अस्पताल तक मथ्यनीगु जूगुलिं गन गन संक्रमण थ्यन धकाः मालेत थाकुइगु तर्क तयादीगु दु ।
LEAVE YOUR COMMENTS