यल महानगरपालिकाय् स्थानीय पाठ्यक्रम तयार

यल -यल महानगरपालिका दुनेया स्कुलय् नेपालभाषा ब्वंकेगु निंतिं स्थानीय पाठ्यक्रम तयार जूगु दु । यल महानगरपालिकाया मेयर चिरिबाबु महर्जनयात आइतवाः छगू ज्याझ्वःया दथुइ पाठ्यक्रम लःल्हाःगु दु । स्थानीय पाठ्यक्रम तयारी कमिटीया संयोजक व यल महानगरपालिकाया शिक्षाधिकारी महेन्द्रबहादुर क्षेत्री व सह–संयोजक तुलसीलाल सिंहं पाठ्यक्रम लःल्हानादीगु खः ।

पाठय्क्रम लःल्हाना कयादिसें मेयर महर्जनं वइगु शैक्षिक सत्रय् हे नेपालभाषा ब्वंकेगु प्रतिबद्धता प्वंकादिसें धयादिल, ‘न्हूगु शैक्षिक सत्र सुरु जुइत यक्व ई मदयेधुंकल । पाठ्यपुस्तक पिथनेगु, जनशक्ति तयार यायेगु ज्या लिसें मेमेगु ज्या यक्व ल्यं दनि, अथे खःसां वइगु शैक्षिक सत्रय् हे लागू यायेगु कथं न्ह्याः वनेगु जुइ ।’

वय्कलं पाठ्यपुस्तक पिकायेत, ब्वंकीपिं न्हूपिं जनशक्ति तयार यायेगु खर्च थुगुसीया बजेटय् दुथ्याना मच्वंगु खँ न्ह्यथनादिसें अथे खःसां मेमेगु खर्च मजूगु बजेट रकमान्तर यानाः जूसां ज्या न्ह्याकेगु खँ नं धयादीगु दु । ‘थुगु आर्थिक दँया बजेटय् स्थानीय पाठ्यक्रमया निंतिं माःगु बजेट फ्यानातःगु मदु, अथे खःसां मेगु खर्च मजूगु शीर्षकपाखें जूसां रकमान्तर यानाः बजेट हयेगु जुइ । बजेट रकमान्तर यायेगु निंतिं नगर परिषद्या स्वीकृति माः, उकिं नगर परिषद् पाखें स्वीकृति कायेगु निंतिं कुतः यायेगु जुइ’ वय्कलं धयादीगु दु ।

यल महानगरपालिका अन्तर्गतय् लाःगु सामुदायिक व निजी स्कुलय् इसीडी (अर्ली चाइल्ड डेभलपमेन्ट) कक्षा निसें ३ कक्षा तक स्थानीय पाठ्यक्रम लागु यायेगु कथं पाठ्यक्रम तयार याःगु खः । पाठ्यक्रम लःल्हानादिसें सहसंयोजक तुलसीलाल सिंहं मस्तय्सं अःपुक ब्वनेफइ कथं पाठ्यक्रम तयार यानागु खँ धयादिल ।

चिचिधिकःपिं मस्तय्सं याउँक ब्वने फइकथं, थुइके फइकथं ब्याकरणयात स्वयां नं नां खँग्वःयात विशेष प्राथमिकता बियाः पाठ्यक्रम तयार यानागु खँ कनादिसें वय्कलं धयादिल, ‘तःधिकःपिंत छक्वलं भाय् ब्वंकेबलय् थाकुइफु, अथे जुल धाःसा पाठ्यक्रमयात लागू यायेत नं समस्या वयेफु धयागु मेयर महर्जनया धापू खः । लिपा समस्या मवयेक लागू यानायंकेगु खःसा मचाबलय् निसें ब्वंकेगु हे दकलय् बांलाःगु उपाय जुइ । व हे कथं आःयात इसीडी कक्षा निसें ३ कक्षा तक लागु यायेगु निंतिं पाठ्यक्रम तयार जूगु दु । थ्व धुंकाः बुलुहुँ मेमेगु तगिमय् नं ब्वंका यंकेगु आधार तयार जुइगु जिमिगु विश्वास दु ।’

यल महानगरपालिकाय् स्थानीय पाठ्यक्रम कथं नेपालभाषा लागु यायेगु निंतिं ताःई न्ह्यव हे खँ जूगु खःसां लिपा अथें दिनाच्वंगु खः । थुकियात ज्यापु समाजया नायः तीर्थलाल महर्जनया पहलय् हाकनं न्ह्याकागु खँ नं सहसंयोजक महर्जनं कनादिल ।

ज्याझ्वलय् न्ववानादिसें पाठ्यक्रम तयारी कमिटीया दुजः दिपक तुलाधरं स्थानीय तहं बजेट बियाः पाठ्यक्रम लागू जक यायेवं सफल जुइ धयागु दइमखु धासें थुकिया निंतिं अभिभावकपिंसं नं कुतः यायेमाःगु खँ धयादिल । ‘अभिभावकपिंसं थः मस्त ब्वंकातयागु स्कुलय् पाठ्यक्रम गुकथं ब्वंकाच्वंगु दु धकाः न्यनेकने यानाः निरन्तर रुपं नेपालभाषा ब्वंकेत प्रोत्साहित यानाच्वनेमाः । थुकिया निंतिं यलय् जातीय खलःपुचःतय्गु नं विशेष भूमिका जुइ’ वय्कलं धयादीगु दु ।

जातीय समाज यलपाखें पाठ्यक्रम लागू जुइवं स्कुलय् अनुगमन यायेगु निंतिं समाजपाखें नेपालभाषा मंकाः खलः यलया नायः ऋषिप्रसाद श्रेष्ठया संयोजकत्वय् छगू कार्यदल दयेकेधुनागु जानकारी नं बिउगु खः । अथेहे महानगर प्रमुख महर्जनं अनुगमन व सहजीकरणया निंतिं पाठ्यक्रम तयारी कमिटीयात हे निरन्तरता बियाः वनेगु प्रतिबद्धता नं प्वंकादीगु खः ।