कला, संस्कृति, सम्पदा विषयय् किपा च्वज्या कासा

येँ(नेपालभाषा टाइम्स)- येँया उत्तर पूर्वी नेवाः वस्ती तोखाया ऐतिहासिक, धार्मिक व सांस्कृतिक महत्वया सम्पदा, संस्कृति, नखःचखः, जात्रा, पर्वयात क्यानभासय् कीगु ज्या जूगु दु । सेभ एण्ड सस्टेन तोखाया ग्वसालय् वंगु शुक्रवाः ‘तोखाया संस्कृति व सम्पदा’ विषयय् विद्यालयस्तरय् किपा च्वज्या कासा जूगु खः ।

तोखा नगरपालिकाया विशेष ग्वाहालिइ जूगु किपा च्वज्या कासाय् तोखा नगरया ११० गू ब्वनेकुथिया सछिं मल्याक विद्यार्थीया सहभागिता दुगु खः । तोखाया थःनेलाछिइ जूगु किपा च्वज्या कासाय् ब्वति काःपिं विद्यार्थीतय्सं तोखाया संस्कृति, सम्पदा, नखः, जात्रायात क्यानभासय् किउगु खः ।

तोखा नगरपालिका २ वडाअध्यक्ष धर्मेन्द्र श्रेष्ठं कासाय् ब्वति काःपिं विद्यार्थीपिंत किपा च्वज्याया हलंज्वलं लःल्हासे कासाया उलेज्या यानादीगु खः । उगु इलय् वय्कलं थुकथंया कासापाखें तोखाया कला, संस्कृतियात जीवन्त याना तयेत ग्वाहालि जुइगु नापं मस्तय्के दुगु प्रतिभायात पित हयेत नं तिबः जुइगु विश्वास प्वंकादिल ।