ने. सं. ११४६ चाैलागा त्रयोदशी - थिमि बालकुमारी जात्रा

जहाज दुर्घटनाय् मदुपिनिगु लुमन्तिइ विश्व शान्ति पदयात्रां

येँ – वंगु छुं दिं न्ह्यः त्रिभुवन अन्तर्राष्ट्रियस्थलय् जहाज दुर्घटनाय् लानाः मदुपिनिगु लुमन्तिइ विश्व शान्ति पदयात्रा–२०७५ जुइगु जूगु दु । बंगलादेशया युएस बंगला एअरया जहाज दुर्घटनाय् लानाः मदुपिनिगु लुमन्तिइ थीथी बौद्ध धर्मावलम्बितय् संघसंस्थां उगु पदयात्रा यायेत्यंगु खः ।

थ्व हे वइगु बैशाख १ गते कुन्हु जहाज दुर्घटनाय् लानाः सीपिं स्वदेशी व विदेशीया लमुन्तिइ नापं विश्व शान्तिया कामना यासें शान्तिया सन्देश बीगु ल्याखं उगु ज्याझ्वः यायेत्यनागु थन जूगु छगू ज्याझ्वलय् जानकारी बिउगु दु । न्हय्गु कुण्डया जलं बोधिसत्व वृक्षारोपण यानाः ज्याझ्वः ह्याकेगु जानकारी नं बिउगु दु ।

जहाज दुर्घटनाय् लानः मदुपिं स्वदेशी व विदेशी यानाः न्यय्छम्हेसिया नामय् बोधिसत्व वृक्षारोपण यायेगु नापं हेलिकप्टरं स्वां वा गायेकेगु नं ज्याझ्वः दु । अथे हे मदुपिनि छेँजः व थःथितिपिंसं बोधिसत्वया वृक्षय् जल हायेकाः मदुपिनिगु शान्तिया कामना याये फइगु उगु ज्याझ्वः काभ्रे जिल्ला पन्तिस्थित नमुरां सुथसिया ८ ताः इलय् उगु ज्याझ्वः न्ह्याइ ।